Guvernatori i ri i BSH, Rama hap garen deri ne 30 shtator
Në një postim të fundit kryeministri Rama ka hapur garën për Guvernator. “ Qeveria e Aleancës për Shqipërinë Europiane fton shqiptarët e shqiptaret që punojnë sot në sistemin financiar ndërkombëtar dhe që janë të disponueshëm të shqyrtohen si kandidatura të mundshme për t’u bërë pjesë e Këshillit Mbikqyrës, të postojnë letrën e tyre të interesit në adresën e çelur enkas keshillimbikqyres BSH@kryeministria.al shkruan kryeministri në postimin e tij në rrjetet sociale.
Sipas Ramës “ky proces është tërësisht i bazuar në vullnetin e mirë të qeverisë për të dhënë kontributin e saj që Banka e Shqipërisë të dalë më e pavarur dhe më e sigurtë nga situata e krijuar”.
Guvernatori i ri i Bankes se Shqiperise
Duke qenë i ndërgjegjshëm që kjo është hera e parë që bëhet një thirje publike për aplikime për Guvernator kryeministri thotë se edhe pse ligji nuk përcakton apo rregullon ndonjë proces a procedurë shprehjeje interesi për mënyrën se si përzgjidhen kandidatët e Këshillit Mbikqyrës nga propozuesit e tyre përpara se të votohen në Kuvend, ne e çelim këtë proces:
a) Për të pasur një mundësi sa më të gjerë përzgjedhjeje
b) Për t’i dhënë hapësirë të merret në konsideratë kujtdo që ka mundësi të japë një kontribut si edhe dëshirë që ta bëjë këtë
c) Për ta ngritur Këshillin Mbikqyrës të Bankës së Shqipërisë në një stad të ri përgjegjësie e përgjegjshmërie profesionale
d) Për të vendosur meritën si parakusht të përzgjedhjes dhe thelluar depolitizimin e Këshillit Mbikqyrës
Çdo i interesuar mund ta përcaktojë vetë nëse dëshiron ose jo që shprehja e tij e interesit të bëhet publike. Mbledhja e letrave të shprehjes së interesit në adresën keshillimbikqyresBSH@kryeministria.al do të vijojë deri në datën 30 shtator.
