Edhe pse në një mjedis të vështirë biznesi për shkak të ndryshimeve të kontratës në mënyrë të njëanshme nga qeveria biznesi i HEC-ve të vogla ka lulëzuar më 2016.
Sipas të dhënave nga Enti Rregullator i Energjisë mësohet se 38 objekte të vogla e të mesme të prodhimit të energjisë elektrike nga uji nisën prodhimin gjatë vitit të kaluar. Kështu numri i HEC-ve private arriti në 138 nga 100 të tilla që ishin më 2015.Ekspertët e sektorit bëjnë me dije se shumë kompani që më parë ishin të fokusuara në ndërtim dhe tregti po diversifikohen në HEC-e. Tregu i energjisë së rinovueshme është i garantuar dhe kostot e prodhimit pas përfundimit të investimit janë të lira.
Bashkë me shtimin e numrit të HEC-ve të vogla është rritur edhe prodhimi i energjisë nga këto objekte. Sipas të dhënave nga Enti Rregullator i Energjisë, prodhimi vendas shënoi vitin e kaluar 7.2 miliardë kilovatorë, nga të cilat 5.1 miliardë kilovatorë u prodhuan nga HEC-e në pronësi të KESH-it dhe 2.1 miliardë kilovatorë të tjera u prodhuan nga HEC private dhe ato me koncesion.
Nga kjo sasi, HEC-i i ri i Banjës në lumin Devoll, që u vu në punë për herë të parë më 2016-ën, prodhoi 69.848.000 kilovatorë. Pavarësisht kostove që kanë dhënë në ambient dhe ndikimin ne habitatet e zonave ku janë, HEC-et private e kanë rritur dukshëm prodhimin e energjisë në vend, duke u bërë kështu pritë për daljen e parave jashtë vendit për blerjen e energjisë.
Por, pavarësisht kontestimeve për ndikimin në ambient, Ministria e Energjetikës ka vërshuar me dhënien e lejeve për ndërtimin e HEC-ve të vogla. Qeveria Rama e ka liberalizuar edhe me tej këtë proces. Për çdo HEC me kapacitet deri në 2.000 vat vendos ministri i Industrisë dhe Energjetikes, ndërkohë që më pare për një vendim të tillë duhej miratimi i Këshillit të Ministrave.Nisur nga kjo lehtësi, Ministria e Energjitikës vijoi dhënien e lejeve me intensitet të lartë gjatë 2016-ës dhe po vijon me të njëjtin ritëm edhe këtë vit.
Edhe pse në një mjedis të vështirë biznesi për shkak të ndryshimeve të kontratës në mënyrë të njëanshme nga qeveria biznesi i HEC-ve të vogla ka lulëzuar më 2016.
