Fondet per Shqiperine, perfitohen 4 projekte infrastrukturore
Shqipëria është një nga përfitueset më të mëdha të Fondit të Investimit të Ballkanit Perëndimor, nismë kjo e Bashkimit Europian për t’iu ardhur në ndihmë vendeve të rajonit.
Në mbledhjen e zhvilluar pak ditë më parë në Stokholm janë prezantuar në total 24 projekte, nga të 6 vendet e Ballkanit Perëndimor, nga të cilat janë miratur vetëm 12, me një vlerë totale investimi prej 11 milionë e 300 mijë euro. Vendi ynë ka marrë mbështetjen për 4 projekte, të cilat arrijnë në shifrën e 3 milionë e 350 mijë eurove, si dhe është përfituese edhe e projektit rajonal për sistemin e transmetimit të energjisë.
4 projektet fituese të Shqipërisë janë: - Rindërtimi i kalatave 1 dhe 2 në Portin e Durrësit, me vlerë 1.100.000 euro - Ndërtimi i “By Pass”-it të Lezhës, me vlerë 350 mijë euro - Mbështetje për zhvillimin e hidrocentralit të Skavicës, me vlerë 1.500.000 euro - Një investim prej 400 mijë eurosh për zhvillimin e sipërmarrjeve dhe turizimit përgjatë liqenit të Shkodrës.
Burime diplomatike thanë për Top Channel se, veç faktit që Shqipëria është përfituesja më e madhe, rëndësi kryesore kanë projektet e miratuara, të cilat janë vepra strategjike për vendin. Ndërkohë, edhe Kosova është përfituese e rëndësishme, pasi ka marrë mbështetjen për ndërtimin e hekurudhës që lidhet me Aeroportin e Prishtinës, me vlerë 1.1 milionë euro, si dhe mbështetjen me 260 mijë euro për përmirësimin e sistemit shëndetësor.
Shqipëria është një nga përfitueset më të mëdha të Fondit të Investimit të Ballkanit Perëndimor, nismë kjo e Bashkimit Europian për t’iu ardhur në ndihmë vendeve të rajonit.
