Borxhi kombetar i SHBA arrin ne 33 trilion dollare per here te pare ne histori
Borxhi kombëtar i SHBA ka arritur në 33 trilionë dollarë, duke kapërcyer një moment historik në një kohë kur shpenzimet e Qeverisë janë tashmë nën vëzhgim të rreptë.
Sipas të dhënave të Departamentit të Thesarit, përcjell Telegrafi, ky borxh i cili mat atë që SHBA-ja u detyrohet kreditorëve, arriti në këtë nivel që nga pasditja e së hënës. Për krahasim, vetëm katër dekada më parë, ky borxh ishte rreth 907 miliardë dollarë.
“Shtetet e Bashkuara të Amerikës kanë arritur një moment historik të ri për të cilin askush nuk do të jetë krenar. Borxhi ynë kombëtar sapo ka tejkaluar vlerën e 33 trilionë dollarëve.
Borxhi i zotëruar nga publiku, kohëve të fundit ka tejkaluar vlerën e 26 trilionë dollarëve”, tha presidentja e Komitetit për Buxhetin Federal, Maya MacGuineas.
Ky nivel historik i borxhit vjen në momentin kur Kongresi po përpiqet të shmangë një mbyllje të Qeverisë Federale në fund të shtatorit.
Gjetjet e fundit nga Zyra e Buxhetit të Kongresit tregojnë se borxhi kombëtar pothuajse do të dyfishohet në madhësi gjatë tre dekadave të ardhshme.
Në fund të vitit 2022, borxhi kombëtar u rrit në rreth 97 për qind të Prodhimit të Brendshëm Bruto (PBB). Sipas ligjit aktual, kjo shifër pritet të rritet në 181 për qind në fund të 2053-së./Burimi: Telegrafi
Sipas të dhënave të Departamentit të Thesarit, përcjell Telegrafi, ky borxh i cili mat atë që SHBA-ja u detyrohet kreditorëve, arriti në këtë nivel që nga pasditja e së hënës. Për krahasim, vetëm katër dekada më parë, ky borxh ishte rreth 907 miliardë dollarë.
