Lëvizja e makinave me grafik, Balluku: Nuk ka ligj që detyron drejtuesit
Zv. Kryeministrja Belinda Balluku ka komentuar sot lidhur me një pikë të planit kombëtar të klimës që parashikon lëvizjen e mjeteve me grafik.
Ajo tha se nuk ka ligj që do të detyrojnë drejtuesit, por është është plan kombëtar për klimën dhe energjinë.
Balluku shtoi se lëvizja e makinave me grafik është praktikë e ndjekur nga vende europiane. “Athina prej 35 vitesh ka qarkullim të makinave sipas numrave të targave duke e ulur lëvizjen e automjeteve me 50%, një ditë ata me targa çift, një ditë ata me targa tek”.
Plani kombëtar për klimën dhe energjinë parashikon ndër të tjera zbatimin e disa masave për reduktimin e përdorimit të burimeve të energjisë, si më poshtë:
Funksionimi efikas: brenda vitit 2025
– Studimi për eliminimin e mbivendosjeve të linjave në itineraret e tyre
– Përdorimi i teknologjive të reja si “Sistemet e Transportit Inteligjent” dhe “Logjistika Inteligjente” për të ndihmuar në menaxhimin efikas të sistemeve të transportit
Promovimi dhe rritja e ndërgjegjësimit: brenda vitit 2025
– Promovimi i transportit rrugor publik të udhëtarëve
– Fushatat e ndërgjegjësimit publik
Tarifa: brenda vitit 2025
– Caktimi i taksave të qarkullimit dhe kufizimi i përdorimit të automjeteve (përdorimi i tyre në ditë të caktuara të javës, p.sh. sipas targës së makinës)
– Përgatitja e një plani optimal parkimi dhe caktimi i tarifave optimale të parkimit, veçanërisht në nyjat kryesore të transportit të udhëtarëve dhe të mallrave
Infrastruktura: brenda vitit 2026
– Përdorimi i automjeteve me efiçencë energjie
– Përmirësimi i cilësisë së rrugëve
Planifikimi urban: brenda vitit 2026
– Reduktimi i nevojave për lëvizshmërinë dhe distancave me anë të planifikimit të integruar.
