Mori statusin strategjik në janar, Qeveria i hap rrugë ndërtimit të TEDA në Xhafzotaj
Qeveria i hap rrugë ndërtimit të parkut teknologjik, pjesë e zonës kadastrale 3852, në Xhafzotaj, Shijak.
Qeveria ka miratuar shpalljen e zonës së teknologjisë dhe zhvillimit ekonomik, si dhe zhvilluesit të zonës me vendndodhje në Xhafzotaj, Shijak, duke i hapur kështu rrugë një investimi strategjik për zhvillimin industrial dhe teknologjik të vendit.
Por cilat do të jenë veprimtaritë, që do të zhvillohen në zonën e re teknologjisë dhe zhvillimit ekonomik?
Sipas vendimit të Këshillit të Ministrave, i propozuar nga Ministria e Kulturës dhe Inovacionit, parashikohet që brenda kësaj zone të zhvillohen një sërë veprimtarish ekonomike, që janë të llojit industri prodhuese; industri e automjeteve dhe pjesëve të këmbimit; industri e teknologjisë së informacionit dhe komunikimit (ICT); industri e pajisjeve elektrike dhe elektronike; industri e produkteve të energjisë; industri e rëndë; industri e lehtë dhe agropërpunuese; përpunim dhe magazinim mallrash; tregtare dhe eksport-import; shërbime; industri të tjera, në përputhje me legjislacionin shqiptar.
Ndërkohë, zhvillues i zonës së teknologjisë dhe zhvillimit ekonomik” shpallet shoqëria “VERTIGO”, sh.p.k.
Gjithashtu, shtrirja, kufijtë, pikat e hyrjes dhe të daljes në zonën e teknologjisë dhe zhvillimit ekonomik përcaktohen në genplanin që i bashkëlidhet këtij vendimi. Territori ku do të ndërtohet kjo qendër, ka një sipërfaqe prej 135 215 m2 dhe periudha e funksionimit të zonës është 35 vjet, me të drejtë përsëritjeje deri në 99 vjet.
Kjo zonë pritet të kthehet në një qendër të rëndësishme për zhvillimin e industrive moderne dhe do të ndikojë në rritjen e punësimit, përmirësimin e infrastruktutrës dhe tërheqjen e investimeve. /Scan
