Degët e bankave arrijnë numrin më të lartë që prej vitit 2021

Numri i degëve të bankave u rrit përsëri në tremujorin e tretë të vitit.

Sipas të dhënave nga Shoqata Shqiptare e Bankave, në fund të muajit shtator bankat tregtare raportuan gjithsej 414 degë, nga 409 degë në fund të tremujorit të dytë dhe 391 që patën raportuar në të njëjtën periudhë të një viti më parë.

Degët e bankave tregtare në vend kanë arritur numrin më të lartë që prej vitit 2021.

Kjo periudhë përkon me bashkimin e fundit me përthithje brenda sektorit bankar, pasi OTP bleu bankën Alpha Bank Albania. Bashkimi mes tyre solli një rënie të mëtejshme të numrit të degëve në dy vitet pasardhëse, por ndërkohë pas vitit 2024 numri i degëve të bankave i është kthyer rritjes.

Kontributin kryesor në rritjen e numrit të degëve krahasuar me një vit më parë e kanë dhënë Banka e Bashkuar e Shqipërisë (UBA), me 13 degë të reja, Banka Amerikane e Investimeve (ABI Bank) me pesë degë, ProCredit Bank me tre degë, Tirana Bank me dy degë dhe Fibank me dy degë .

Mes bankave të tjera, BKT dhe Intesa Sanpaolo kanë reduktuar numrin e degëve me nga një njësi secila.

Bankat me praninë më të gjerë gjeografike ngelen Raiffeisen Bank, me 74 degë, e ndjekur nga BKT me 62 degë dhe Credins Bank, me 52 degë.

Paralelisht, edhe numri i punonjësve të sektorit bankar u rrit më tej 7445 punonjës, 5% më shumë krahasuar me një vit më parë.

Numri i degëve dhe agjencive bankare në Shqipëri e ka shënuar nivelin më të lartë në vitin 2012, me 556 degë dhe agjenci. Nga ai moment, numri i njësive bankare të shërbimit nisi të pakësohet, edhe për faktin se cikli i rritjes së madhësisë së sektorit bankar u ndërpre.

Efektet e krizës dhe nevoja për një kontroll më rigoroz të shpenzimeve bëri që shumica e bankave të frenonin zgjerimin e rrjetit dhe të mbyllnin një pjesë të degëve ekzistuese.

Procesi u theksua më shumë pas vitit 2015, nga procesi i konsolidimit të sektorit bankar dhe ulja e numrit të bankave tregtare. Numri i bankave tregtare ra nga 16 në 11 dhe si rezultat i bashkimeve mes bankave ekzistuese një pjesë e mirë e degëve të bankave të përthithura u mbyllën.

Por, në vitet e fundit, disa prej bankave të sektorit kanë nisur një cikël të zgjerimit të degëve, të lidhur me strategjitë e tyre të rritjes, veçanërisht në segmentin retail. Objektivat e bankave në fjalë janë veçanërisht të përqendruara në produktet e depozitave. Zgjerimi i bazës së depozitave është thelbësor në rritjen e pjesës së tregut edhe në huadhënie dhe në aktivet e tjera në përgjithësi.

Këto shifra tregojnë se degët dhe punonjësit e bankave po shtohen, pavarësisht tendencës së digjitalizimit në rritje të produkteve dhe shërbimeve bankare.

Rritja e numrit të degëve është e lidhur me momentin pozitiv të sektorit bankar në periudhën pas pandemisë. Performanca e mirë financiare ka nxitur banka të veçanta të investojnë edhe në zgjerimin e biznesit dhe të rrjetit të degëve.

Ecuria e fitimeve të sektorit paraqitet e mirë edhe për këtë vit, por në rënie krahasuar me të njëjtën periudhë të një viti më parë.

Sipas të dhënave paraprake të publikuara nga Shoqata Shqiptare e Bankave, fitimi i përbashkët i bankave tregtare me Standardet Ndërkombëtare të Raportimit Financiar (IFRS) për 9-mujorin 2025 arriti në 26 miliardë lekë, në rënie me 7.2% krahasuar me një vit më parë. /Monitor(https://monitor.al/deget-e-bankave-arrijne-numrin-me-te-larte-qe-prej-vitit-2021/)

Më të lexuarat