Inflacioni u rrit në 3.4 për qind në korrik, ushqimet dhe argëtimi kontribuesit kryesor
Çmimet e konsumit në Shqipëri u rritën me 3.4 për qind në korrik 2026 krahasuar me të njëjtin muaj të një viti më parë, ndërsa në raport me qershorin shënuan një ulje të lehtë prej 0.1 për qind.
Ushqimet mbeten kontribuesi kryesor në inflacion, por presione të forta erdhën edhe nga argëtimi, restorantet dhe transporti.
Sipas Indeksit të Harmonizuar të Çmimeve të Konsumit (IHÇK), inflacioni në Shqipëri arriti në 3.4 për qind në korrik, duke u pozicionuar mbi normën prej 3 për qind të Bashkimit Europian.
Grupi “Ushqime dhe pije joalkoolike” dha kontributin më të madh në rritjen vjetore të çmimeve, me 1.09 pikë përqindjeje. Çmimet e produkteve të këtij grupi ishin 3.2 për qind më të larta krahasuar me korrikun e vitit të kaluar.
Pas ushqimeve, ndikimin më të madh e dha grupi “Argëtim, sport dhe kulturë”, me një kontribut prej 0.55 pikë përqindjeje. Ky grup regjistroi njëkohësisht një nga shtrenjtimet më të forta, me çmimet që u rritën me 8.5 për qind në terma vjetorë.
Restorantet dhe shërbimet e akomodimit kontribuuan me 0.53 pikë përqindjeje në inflacionin e përgjithshëm, ndërsa çmimet e tyre u rritën me 3.6 për qind. Transporti dha një kontribut prej 0.39 pikë përqindjeje, me çmime 4.6 për qind më të larta se një vit më parë, ndërsa pijet alkoolike dhe duhani u shtrenjtuan me 4.5 për qind.
Rritje vjetore të çmimeve u regjistruan gjithashtu në shërbimet arsimore, me 3.3 për qind, si dhe në grupin “Kujdesi personal, mbrojtja sociale dhe mallra e shërbime të ndryshme”, me 3.5 për qind.
Çmimet ulen lehtë krahasuar me qershorin
Pavarësisht rritjes vjetore prej 3.4 për qind, në krahasim me muajin qershor çmimet e konsumit shënuan një ulje prej 0.1 për qind.
Rënia më e fortë mujore u regjistrua në grupin “Informacioni dhe komunikimi”, ku çmimet u ulën me 1.3 për qind. Veshjet dhe këpucët u liruan me 1.2 për qind, sigurimet dhe shërbimet financiare me 1 për qind, ndërsa ushqimet dhe pijet joalkoolike shënuan një rënie mujore prej 0.9 për qind.
Në drejtim të kundërt lëvizi transporti, që regjistroi rritjen më të fortë gjatë muajit, me 2.5 për qind. Çmimet në grupin “Qira, ujë, energji elektrike, gaz dhe karburante të tjera” u rritën gjithashtu me 1 për qind krahasuar me qershorin.
Të dhënat e korrikut tregojnë kështu një kontrast mes rritjes vjetore të çmimeve prej 3.4 për qind dhe uljes së lehtë mujore prej 0.1 për qind. Ushqimet vijojnë të kenë peshën kryesore në inflacionin vjetor, ndërsa transporti ishte grupi me rritjen më të fortë të çmimeve brenda muajit.
k.jpg)