Gjysmë miliard lekë për fasadat e Dhërmiut, Bashkia Himarë hap tenderin
Bashkia Himarë parashikon 500 milionë lekë për fazën e dytë të rehabilitimit të fasadave në Dhërmi.
Bashkia Himarë ka hapur tenderin me fond limit 500 milionë lekë pa TVSH për fazën e dytë të rehabilitimit të fasadave në fshatin Dhërmi. Investimi do të financohet nga buxheti i bashkisë gjatë viteve 2026–2028, ndërsa kontrata parashikohet të zgjasë 20 muaj kalendarikë. Fondi është ndarë në rreth 166.67 milionë lekë për secilin nga tre vitet, ndërsa afati i fundit për paraqitjen dhe hapjen e ofertave është 9 shtator 2026, ora 09:00.
Ndërhyrja shkon përtej rehabilitimit të fasadave
Megjithëse procedura mban emrin “Rehabilitimi i fasadave të fshatit Dhërmi, loti II”, dokumentet tregojnë se projekti është më i gjerë se lyerja apo riparimi i jashtëm i ndërtesave. Parashikohet restaurimi i fasadave dhe çative, trajtimi i dyerve, dritareve, grilave, ulluqeve dhe elementeve tradicionale, me synim ruajtjen e tipologjisë dhe karakterit historik të ndërtesave.
Punimet përfshijnë gjithashtu ndërhyrje ndërtimore dhe strukturore, instalime hidrosanitare dhe elektrike, ndriçim, punime me gur dhe hidroizolime. Dokumentet parashikojnë ndërhyrje edhe në rrugica, sheshe dhe hapësira publike, duke e shtrirë projektin në një rikualifikim më të gjerë të zonës së Dhërmiut.
Kontrata do të realizohet “me çelësa në dorë”
Operatori fitues do të jetë përgjegjës si për projektimin e detajuar, ashtu edhe për realizimin e punimeve. Nga afati i përgjithshëm i kontratës, 4 muaj janë parashikuar për hartimin e projektit të zbatimit.
Tenderi kërkon që operatorët të kenë realizuar, në të paktën një nga vitet 2023–2025, xhiro vjetore jo më të vogël se 500 milionë lekë. Për përvojën kërkohet një punë e ngjashme me vlerë të paktën 50% të fondit limit ose punë të ngjashme gjatë pesë viteve të fundit me vlerë të përgjithshme jo më të vogël se dyfishi i fondit limit.
k.jpg)