Nuk ndalet rënia e Euros, arrin minimum të ri historik pranë 92.4 lekëve

Euro zbriti në 92.44 lekë, niveli më i ulët historik, ndërsa forcimi i Lekut vijon të përshpejtohet.

Kursi i këmbimit të Euros me Lekun ka vijuar rënien edhe këtë javë, duke prekur një minimum të ri historik. Sipas kursit zyrtar të Bankës së Shqipërisë, Euro u këmbye të martën me 92.44 lekë, niveli më i ulët i regjistruar ndonjëherë. Që nga fillimi i vitit, kursi Euro/Lek ka rënë me 4.5%, ndërsa krahasuar me të njëjtën periudhë të një viti më parë rënia arrin në 4.9%.

Oferta e lartë e valutës gjatë sezonit veror ka thelluar tendencën rënëse të Euros, e cila ishte shfaqur që në tremujorin e parë. Banka e Shqipërisë e lidh forcimin e Lekut kryesisht me përmirësimin e Bilancit të Pagesave dhe rritjen e flukseve valutore në ekonominë shqiptare.

Deficiti i llogarisë korrente bie, investimet e huaja në rekord

Në tremujorin e parë të vitit, deficiti i llogarisë korrente u tkurr në 228 milionë euro, 28% më pak krahasuar me të njëjtën periudhë të një viti më parë. Ndërkohë, investimet e huaja direkte arritën në 404 milionë euro, niveli më i lartë historik për këtë periudhë të vitit dhe 11.6% më shumë në terma vjetorë.

Sipas Bankës së Shqipërisë, analiza e të dhënave të tregut valutor dhe Bilancit të Pagesave deri në tremujorin e parë konfirmon lidhjen e ngushtë mes vëllimeve të tregtimit valutor dhe flukseve të shkëmbimeve të mallrave e shërbimeve me jashtë. Rritja sezonale e prurjeve valutore gjatë tremujorit të dytë dhe veçanërisht të tretë mund të shpjegojë edhe përshpejtimin e zhvlerësimit të Euros.

Këmbimet valutore arrijnë 4.5 miliardë euro

Vëllimi i tregtimit valutor në tregun e brendshëm arriti një rekord të ri historik në tremujorin e dytë. Vlera e këmbimeve valutore ishte gati 4.5 miliardë euro, rreth 30% më shumë krahasuar me të njëjtën periudhë të një viti më parë, duke kaluar edhe nivelet e regjistruara në tremujorin e tretë të vitit të kaluar.

Rënia e Euros po përshpejtohet përsëri gjatë vitit 2026, pasi ishte ngadalësuar disi vitin e kaluar. Banka e Shqipërisë vazhdon ndërhyrjet në tregun valutor përmes blerjeve të Euros, me synim zbutjen e kësaj tendence. Vetëm në tremujorin e parë, Banka Qendrore bleu rreth 140 milionë euro, niveli më i lartë i regjistruar ndonjëherë për këtë periudhë të vitit.

Burimi: Banka e Shqipërisë

Euro prek minimumin historik prej 92.44 lekësh, ndërsa flukset valutore dhe forcimi i Lekut vijojnë të ushtrojnë presion mbi kursin.

Më të lexuarat