Rinasi, Bërxulla dhe Domja i kalojnë Tiranës, krijohet njësia e re administrative e aeroportit
Reforma territoriale parashikon kalimin e Rinasit, Bërxullës dhe Domjes nën administrimin e Bashkisë Tiranë.
Reforma e re administrativo-territoriale, e propozuar nga mazhoranca, parashikon krijimin e njësisë së re administrative Rinas në Bashkinë Tiranë. Sipas relacionit, ajo do të përfshijë fshatin Rinas, aktualisht pjesë e Bashkisë Krujë, si dhe Bërxullën dhe Domjen, që aktualisht administrohen nga Bashkia Vorë.
Synimi është që Aeroporti Ndërkombëtar “Nënë Tereza” dhe zona ekonomike përreth tij të administrohen brenda një territori të vetëm të lidhur me Tiranën. Relacioni argumenton se kjo hapësirë funksionon tashmë si një zonë e vetme ekonomike me kryeqytetin, veçanërisht për shkak të aktivitetit të lartë në transport, logjistikë dhe zhvillim ekonomik.
Ndryshojnë kufijtë mes Tiranës, Vorës dhe Krujës
Ndryshe nga 13 konsolidimet e tjera të parashikuara në reformë, ku bashki të tëra bashkohen me njëra-tjetrën, rasti i Rinasit sjell ndryshim konkret të kufijve territorialë ndërmjet tri bashkive. Tirana do të marrë territore që aktualisht administrohen nga Kruja dhe Vora, duke krijuar prej tyre një njësi të re administrative.
Ndryshimi ka edhe rëndësi ekonomike, pasi aeroporti dhe territori përreth përbëjnë një nga zonat me aktivitetin më intensiv të transportit dhe logjistikës në vend. Lidhja e fortë ekonomike e kësaj zone me kryeqytetin është një nga argumentet kryesore të përdorura për kalimin e saj nën administrimin e Tiranës.
Kërkohet konsultimi i banorëve
Relacioni përcakton se ndryshimi i kufijve nuk mund të realizohet vetëm përmes rishikimit të hartës administrative. Përpara miratimit duhet të merret mendimi i popullsisë së prekur në bashkitë Krujë, Vorë dhe Tiranë, si dhe të rregullohen çështjet financiare që lidhen me transferimin e territorit. Kjo lidhet me kërkesën kushtetuese për konsultimin paraprak të banorëve në rastet kur ndryshohen kufijtë e njësive vendore.
Nëse reforma miratohet sipas propozimit, Aeroporti Ndërkombëtar “Nënë Tereza” dhe zona ekonomike e Rinasit do të bëhen pjesë e organizimit administrativo-territorial të Bashkisë Tiranë, duke zgjeruar territorin e kryeqytetit në drejtim të Krujës dhe Vorës.
k.jpg)