Konfirmohet rasti i parë me Ethet e Nilit në Shqipëri, ISHP nis hetimin në Korçë
ISHP ka nisur hetimin epidemiologjik në Korçë pas konfirmimit të rastit të parë me virusin e Nilit Perëndimor.
Instituti i Shëndetit Publik ka nisur hetimin epidemiologjik në qarkun e Korçës pas konfirmimit të rastit të parë me virusin e Nilit Perëndimor në Shqipëri. Një ekip specialistësh të ISHP-së nga Tirana ka mbërritur në terren, ku po kryen hetimin entomologjik dhe depistimin në vatër, me qëllim identifikimin e mushkonjave që mund të transmetojnë virusin dhe marrjen e masave për kontrollin e tyre.
I infektuari është një 72-vjeçar nga Korça
Rasti i konfirmuar i përket një 72-vjeçari nga Korça, i cili ndodhet aktualisht në Spitalin Rajonal të Korçës, ku po merr trajtim mjekësor. I moshuari banon në qytetin e Korçës dhe dyshohet se është pickuar nga një mushkonjë gjatë qëndrimit në një lulishte, ku kalonte një pjesë të konsiderueshme të ditës. Pas shfaqjes së shqetësimeve shëndetësore, ai iu drejtua spitalit dhe analizat laboratorike konfirmuan infektimin me virusin e Nilit Perëndimor.
Kontrolle për mushkonjën bartëse
Specialistët e ISHP-së po kryejnë kontrolle në zona të ndryshme të qarkut të Korçës për të evidentuar praninë e mushkonjës bartëse dhe për të përcaktuar masat që duhet të ndërmerren për frenimin e përhapjes së saj. Në kuadër të hetimit dhe masave parandaluese po kryhet edhe depistimi në vatër, ndërsa në zonat ku konstatohet prania e mushkonjave pritet të ndërhyhet me dezinfektim dhe trajtime të posaçme.
Si transmetohen Ethet e Nilit Perëndimor
Ethet e Nilit Perëndimor transmetohen te njerëzit kryesisht përmes pickimit të mushkonjave të infektuara. Në shumicën e rasteve, infeksioni mund të kalojë pa simptoma ose të shfaqet me temperaturë, dhimbje koke, dhimbje muskujsh, të përziera dhe të vjella. Në rastet e rënda, virusi mund të prekë sistemin nervor dhe të shkaktojë komplikacione serioze.
Autoritetet shëndetësore vijojnë monitorimin në terren, ndërsa hetimi i ISHP-së pritet të përcaktojë shkallën e pranisë së mushkonjës bartëse në zonë dhe masat që do të ndërmerren për parandalimin e rasteve të tjera.
k.jpg)