Pagesat me kartë u rritën me 28 për qind në gjysmën e parë të vitit
Në gjashtë muajt e parë të vitit, vlera e pagesave me kartë arriti në 58.3 miliardë lekë.
Pagesat me kartë u rritën me ritme të larta edhe në gjysmën e parë të këtij viti. Sipas të dhënave nga Banka e Shqipërisë, në gjashtë muajt e parë të vitit u regjistruan gjithsej 16 milionë pagesa me kartë në pikat elektronike të shitjes (POS). Numri i pagesave me kartë është rritur me 28% krahasuar me gjashtëmujorin e parë të vitit të kaluar.
Tashmë, numri i pagesave me kartë në POS-e ka kaluar në mënyrë të qëndrueshme numrin e tërheqjeve cash në bankomate. Për çdo 100 veprime të kryera me karta pagesash, pa përfshirë veprimet me para elektronike, afërsisht 56 prej tyre ishin pagesa në terminale POS, ndërsa pjesa tjetër ishin tërheqje apo depozitime parash cash.
58.3 miliardë lekë pagesa me kartë
Vlera totale e pagesave me kartë për gjashtë muaj ka arritur në 58.3 miliardë lekë, me një rritje prej 21% krahasuar me të njëjtën periudhë të vitit të kaluar. Të matura në vlerë monetare, pagesat me kartë përbënin 18.3% të totalit të veprimeve me karta, në rritje nga niveli prej 17.4% i vitit të kaluar.
Duke pasur parasysh se periudha e pikut turistik korrik–gusht shoqërohet me rritje të pagesave me kartë, është e pritshme që vlera e pagesave për gjysmën e dytë të vitit të jetë më e lartë. Rritja e numrit të turistëve të huaj në vitet e fundit është një nga faktorët kryesorë që i ka dhënë shtysë rritjes së pagesave me kartë në Shqipëri. Megjithatë, shtimi i numrit të bizneseve që pranojnë pagesa me kartë ka rritur ndjeshëm edhe përdorimin e tyre nga konsumatorët vendas.
Cash-i vijon të ketë peshë të lartë në ekonomi
Shqipëria mbetet një vend me shkallë të lartë të përdorimit të parasë cash, fenomen i lidhur me një përfshirje ende të pamjaftueshme financiare, por edhe me nivelin e konsiderueshëm të informalitetit dhe evazionit fiskal. Vlerësohet se afërsisht 40% e monedhës lokale në qarkullim qëndron jashtë bankave, pa përfshirë valutat e huaja, për të cilat nuk ekzistojnë statistika zyrtare. Shqipëria është një ndër vendet me nivelin më të lartë të parasë jashtë bankave, çka nënkupton një shkallë të lartë të përdorimit të parasë cash në ekonomi.
Megjithatë, rritja e shpejtë e pagesave me kartë është një sinjal pozitiv që tregon një tendencë të zhvendosjes, sado të ngadaltë, drejt formave alternative të pagesave.
1.69 milionë karta aktive në mesin e vitit 2026
Sipas të dhënave nga Banka e Shqipërisë, në mesin e vitit 2026 numri i kartave aktive arriti në 1.69 milionë, në rritje me 7% krahasuar me një vit më parë. Në shumicën dërrmuese, kartat e pagesave janë karta debiti, të lidhura me llogaritë rrjedhëse të individëve dhe bizneseve. Pjesa tjetër janë karta krediti ose karta me funksion paraje elektronike.
k.jpg)