Transporti publik paralajmëron reduktim të flotës me 20–30 për qind nga 1 shtatori
Operatorët e transportit publik paralajmërojnë se, duke nisur nga 1 shtatori 2026, do të reduktojnë me rreth 20–30 për qind flotën e mjeteve në qarkullim.
Shkak, sipas tyre, janë vështirësitë financiare dhe kostot e larta të karburantit, që kanë cenuar mundësinë për të operuar me kapacitet të plotë.
Shoqata Kombëtare e Transportit Qytetas dhe Shoqata e Transportit Urban dhe Interurban i janë drejtuar Kryeministrisë, Bashkisë Tiranë, Ministrisë së Infrastrukturës dhe Energjisë dhe Ministrisë së Ekonomisë dhe Inovacionit, duke kërkuar ndërhyrje të menjëhershme. Në kërkesën e datës 31 gusht 2026, shoqatat argumentojnë se gjendja financiare e operatorëve ka arritur në një nivel që ndikon drejtpërdrejt në vazhdimësinë e shërbimit me kapacitet të plotë.
Nga 1 shtatori, më pak autobusë në qarkullim
Sipas paralajmërimit, nga 1 shtatori operatorët do të operojnë me një flotë të reduktuar me rreth 20–30 për qind, në varësi të kapacitetit financiar dhe operacional të secilit prej tyre. Shoqatat theksojnë se kjo nuk është një zgjedhje, por pasojë e pamundësisë financiare për të përballuar kostot e operimit të flotës së plotë, ku karburanti përbën një nga zërat kryesorë.
Reduktimi pritet të ndikojë drejtpërdrejt te qytetarët, duke sjellë ulje të frekuencës së shërbimit, intervale më të gjata mes autobusëve, mbingarkesë të mjeteve që do të vijojnë të qarkullojnë dhe vështirësi më të mëdha për përdoruesit e përditshëm të transportit publik.
Operatorët kërkojnë kompensimin e karburantit
Një nga shqetësimet kryesore lidhet me kompensimin e kostove të karburantit. Sipas dokumentit, pavarësisht kërkesave dhe komunikimeve të vazhdueshme me institucionet përgjegjëse, për një pjesë të problematikave ende nuk është dhënë një përgjigje apo zgjidhje konkrete.
Shoqatat argumentojnë se çmimet e larta të karburantit, të kombinuara me shpenzimet e tjera të nevojshme për funksionimin e aktivitetit, kanë cenuar ndjeshëm likuiditetin e operatorëve. Për këtë arsye, kërkohet realizimi i kompensimit të parashikuar për kostot e karburantit dhe vijimi i mbështetjes financiare edhe për periudhën në vazhdim.
Paralajmërimi: Rrezikohet cilësia e shërbimit
Operatorët paralajmërojnë se funksionimi me flotë të reduktuar do të ndikojë drejtpërdrejt në cilësinë dhe vazhdimësinë e transportit publik. Ata kërkojnë trajtimin me prioritet të situatës, me synim shmangien e përkeqësimit të mëtejshëm të shërbimit dhe rikthimin sa më shpejt të kapacitetit të plotë operacional.
Nëse nuk arrihet një zgjidhje financiare, paralajmërimi i dy shoqatave pritet të përkthehet nga 1 shtatori në më pak autobusë në qarkullim, kohë më të gjata pritjeje dhe mbingarkesë më të madhe të transportit publik.
k.jpg)