Transporti publik, 116 operatorë përfituan 119.7 mln lekë kompensim për naftën
Administrata Tatimore ka përfunduar shpërndarjen e fondit të kompensimit për operatorët e transportit publik, të parashikuar për të zbutur efektet e çmimit të lartë të karburantit gjatë periudhës mars–maj 2026.
Nga skema kanë përfituar 116 subjekte, ndërsa vlera e kompensimit të shpërndarë ka arritur në 119.7 milionë lekë.
Sipas të dhënave të publikuara nga Administrata Tatimore, fondi i alokuar për subjektet përfituese është realizuar në masën 100 për qind. Mbështetja u dha në formën e kompensimit të një pjese të kostos së karburantit, në një periudhë kur çmimi i naftës dhe kostot e tjera të aktivitetit kanë ushtruar presion mbi operatorët e transportit publik.
Qeveria kishte miratuar kompensimin në masën 50 lekë për litër karburant për shoqëritë që operojnë në linjat qytetëse, rrethqytetëse dhe ndërqytetëse. Mbështetja mbulonte periudhën mars–maj 2026, ndërsa efektet financiare të parashikuara për zbatimin e saj ishin 250 milionë lekë.
Të dhënat përfundimtare tregojnë se për subjektet që kanë përfituar nga skema janë shpërndarë 119.7 milionë lekë. Kjo shumë përfaqëson rreth 48 për qind të efektit financiar prej 250 milionë lekësh të parashikuar për skemën. Megjithatë, Administrata Tatimore njofton se fondi i alokuar konkretisht për kompensimin e përfituesve është realizuar në masën 100 për qind.
Kompensimi me 50 lekë për litër pritet të vijojë
Mbështetja për sektorin e transportit publik nuk pritet të përfundojë me kompensimin për muajt mars, prill dhe maj. Autoritetet dhe shoqatat e transportit kanë rënë dakord për vijimin e kompensimit edhe për tre muaj të tjerë, për shkak të kostos së lartë të naftës.
Skema e re pritet të ndjekë të njëjtën formulë të përdorur më parë. Operatorët do të kompensohen sërish me 50 lekë për çdo litër karburant, ndërsa mbështetja do të shtrihet për një periudhë tremujore.
Vijimi i kompensimit është i rëndësishëm veçanërisht për transportin publik, ku karburanti përbën një nga zërat kryesorë të kostove operative. Rritja e çmimit të naftës prek drejtpërdrejt shpenzimet e kompanive dhe ushtron presion edhe mbi tarifat e transportit.
Me zgjatjen e skemës edhe për tre muaj të tjerë, synimi është që një pjesë e kostos shtesë të karburantit të vazhdojë të përballohet nga buxheti, duke lehtësuar operatorët e transportit qytetës, rrethqytetës dhe ndërqytetës.
k.jpg)