Vuçiç shpërndan Parlamentin, Serbia shkon në zgjedhje të jashtëzakonshme më 25 tetor
Serbia do të shkojë në zgjedhje të jashtëzakonshme parlamentare më 25 tetor.
Presidenti Aleksandër Vuçiç njoftoi të mërkurën shpërndarjen e Parlamentit dhe shpalljen e zgjedhjeve të parakohshme, pas muajsh protestash dhe kërkesash nga studentët për një votim të ri.
Vuçiç iu drejtua publikut duke bërë të ditur vendimin për shpërndarjen e Parlamentit dhe caktimin e datës së zgjedhjeve. Ai deklaroi se vendimi është marrë “duke ndjekur interesat e Serbisë dhe qytetarëve të saj”.
Kërkesat për zgjedhje të parakohshme janë intensifikuar që nga maji i vitit 2025, kur studentët që mbajnë të bllokuara fakultetet nisën të kërkojnë një votim të ri. Për muaj me radhë, studentët kanë udhëhequr protesta kundër Qeverisë, duke ushtruar presion mbi pushtetin.
Protestat pas tragjedisë në Novi Sad
Në qendër të protestave ka qenë edhe kërkesa për përgjegjësi për vdekjen e 16 njerëzve në incidentin e ndodhur në Stacionin Hekurudhor në Novi Sad në nëntor të vitit 2024.
Përfaqësuesit e pushtetit kishin paralajmëruar disa herë mundësinë e shpalljes së zgjedhjeve të parakohshme. Vetë Vuçiç ka deklaruar gjithashtu se do të tërhiqet nga posti i presidentit përpara përfundimit të mandatit të tij në prill të vitit 2027.
Zgjedhjet e fundit u shoqëruan me pretendime për parregullsi
Zgjedhjet e mëparshme parlamentare në Serbi u mbajtën në dhjetor të vitit 2023. Procesi zgjedhor u shoqërua me pretendime nga opozita, organizatat joqeveritare dhe vëzhguesit ndërkombëtarë për parregullsi serioze, presion ndaj votuesve, keqpërdorim të burimeve publike dhe përdorim të funksioneve publike për qëllime të fushatës.
Pushteti pretendon se kushtet zgjedhore janë përmirësuar që atëherë, në përputhje me rekomandimet e Zyrës së OSBE-së për Institucione Demokratike dhe të Drejtat e Njeriut (ODIHR). Megjithatë, disa organizata vendëse vlerësojnë se problemet kryesore të evidentuara në proceset e mëparshme zgjedhore nuk janë zgjidhur.
Me shpërndarjen e Parlamentit dhe caktimin e zgjedhjeve për 25 tetor, Serbia hyn tashmë në një proces të ri zgjedhor, pas një periudhe të gjatë tensionesh politike dhe protestash të udhëhequra nga studentët.
k.jpg)