BERZH gati të mbështesë financimin e bizneseve të vogla, në fokus programi i BSH
BERZH ka shprehur gatishmërinë për të mbështetur programin e Bankës së Shqipërisë për financimin e bizneseve mikro dhe të vogla.
Banka Evropiane për Rindërtim dhe Zhvillim (BERZH) ka shprehur gatishmërinë për të mbështetur programin e Bankës së Shqipërisë për financimin e bizneseve mikro dhe të vogla, duke hapur mundësinë për një bashkëpunim konkret në zbatimin e kësaj nisme.
Çështja ishte një nga temat e diskutuara gjatë takimit që Guvernatori i Bankës së Shqipërisë, Gent Sejko, zhvilloi me Francis Malige, Drejtor Menaxhues për Institucionet Financiare në BERZH, në kuadër të vizitës së këtij të fundit në Shqipëri. Në takim morën pjesë edhe drejtues të tjerë të BERZH-it për Evropën Juglindore dhe rajonin.
Një pjesë e rëndësishme e diskutimeve u përqendrua te kreditimi i ekonomisë dhe veçanërisht te mundësitë për të rritur aksesin e bizneseve më të vogla në financim.
Sipas Bankës së Shqipërisë, programi i saj për financimin e bizneseve mikro dhe të vogla synon pikërisht lehtësimin e aksesit të këtyre sipërmarrjeve në financim, si dhe mbështetjen e investimeve dhe zhvillimit të aktivitetit të tyre.
Përfaqësuesit e BERZH-it e kanë vlerësuar pozitivisht programin dhe objektivat e tij, ndërsa kanë shprehur gatishmërinë për të mbështetur Bankën e Shqipërisë dhe për të shqyrtuar mundësi konkrete bashkëpunimi për zbatimin e nismës.
Ky bashkëpunim potencial vjen në një periudhë kur kreditimi i ekonomisë po ruan një ecuri pozitive. Guvernatori Sejko vlerësoi se sistemi bankar shqiptar vijon të jetë i mirëkapitalizuar, likuid dhe i qëndrueshëm dhe se ekzistojnë kushtet që kreditimi të vazhdojë të kontribuojë në rritjen ekonomike.
Megjithatë, zgjerimi i kredisë duhet të shoqërohet me kujdes në administrimin e rrezikut. Sipas Guvernatorit, kreditimi duhet të rritet në mënyrë të shëndetshme, duke ruajtur cilësinë e portofolit dhe standardet e duhura të menaxhimit të rrezikut.
Në takim u diskutua gjithashtu procesi i afrimit të kuadrit rregullator dhe mbikëqyrës të sektorit bankar shqiptar me atë të Bashkimit Evropian. Banka e Shqipërisë evidentoi progresin e bërë në përafrimin e rregullave dhe praktikave mbikëqyrëse me standardet evropiane, një proces që shihet si i rëndësishëm jo vetëm për forcimin e sistemit bankar, por edhe për integrimin financiar të vendit me BE-në.
Integrimi evropian, sipas Sejkos, kërkon vijimin e reformave, harmonizimin e mëtejshëm të kuadrit rregullator dhe rritjen e standardeve të funksionimit të tregut financiar. BERZH, nga ana tjetër, ka konfirmuar gatishmërinë për të vijuar mbështetjen e reformave dhe iniciativave që ndikojnë në zhvillimin e sektorit financiar dhe financimin e ekonomisë reale.
Një tjetër drejtim bashkëpunimi lidhet me Agjencinë e Sigurimit të Depozitave. Palët diskutuan për forcimin e mekanizmave të sigurisë financiare dhe vlerësuan asistencën e BERZH-it në ngritjen e kapaciteteve institucionale dhe përafrimin me praktikat evropiane e ndërkombëtare.
Takimi pasoi gjithashtu prezantimin në Shqipëri të nismës “We Finance Code”, të zhvilluar në bashkëpunim mes Bankës së Shqipërisë dhe BERZH-it. Nisma synon të përmirësojë aksesin në financim për sipërmarrjet e drejtuara nga gratë. Sejko kërkoi që angazhimet e marra në kuadër të saj të përkthehen në masa dhe rezultate konkrete për bizneset.
k.jpg)