Dy reparte ushtarake marrin 271 mln euro investime, sa 37 për qind e buxhetit të Mbrojtjes
Repartet Ushtarake 3001 dhe 1001 kanë një plan investimesh prej 25.7 miliardë lekësh, ose rreth 271 milionë euro, për vitin 2026.
Shuma përfaqëson rreth 37 për qind të të gjithë buxhetit të Ministrisë së Mbrojtjes, sipas të dhënave të Thesarit të Ministrisë së Financave.
Të dhënat zyrtare tregojnë se Reparti Ushtarak 1001 ka një plan vjetor investimesh prej 6 miliardë lekësh, ndërsa Reparti Ushtarak 3001 ka në dispozicion 19.7 miliardë lekë. Të dyja strukturat lidhen me kapacitete më të gjera të Forcave të Armatosura: Reparti 1001 me Komandën e Forcës Tokësore dhe Reparti 3001 me Komandën e Forcës Ajrore.
Peshën kryesore e mban Reparti Ushtarak 3001. Me një plan prej 19.7 miliardë lekësh, vetëm kjo strukturë përqendron investime sa rreth 28.5 për qind e të gjithë buxhetit të Ministrisë së Mbrojtjes. Reparti Ushtarak 1001 ka në dispozicion 6 miliardë lekë, ose rreth 8.7 për qind të buxhetit total. Të marra së bashku, dy strukturat përqendrojnë më shumë se një të tretën e fondeve të Mbrojtjes.
82 mln euro investime të realizuara deri në korrik
Në shtatë muajt e parë të vitit 2026, dy strukturat kanë realizuar së bashku 7 miliardë lekë, ose rreth 82 milionë euro investime. Reparti Ushtarak 1001 ka shpenzuar 2.4 miliardë lekë, afërsisht 40 për qind të planit vjetor, ndërsa Reparti Ushtarak 3001 ka realizuar 4.6 miliardë lekë, ose rreth 23.4 për qind të fondit të planifikuar.
Në total, realizimi i investimeve të dy strukturave deri në fund të korrikut arrin në rreth 27.2 për qind të planit vjetor. Rreth 18.7 miliardë lekë mbeten për t'u ekzekutuar gjatë muajve të mbetur të vitit. Shpenzimet e realizuara deri në korrik nga dy repartet janë të barabarta me rreth 10.1 për qind të të gjithë buxhetit vjetor të Ministrisë së Mbrojtjes.
Buxheti i Mbrojtjes u rrit me 10.29 miliardë lekë
Përqendrimi i investimeve te Forca Tokësore dhe Forca Ajrore vjen në një vit kur buxheti i Ministrisë së Mbrojtjes është rritur ndjeshëm krahasuar me planifikimin fillestar. Fondet totale të Ministrisë janë rritur nga rreth 58.95 miliardë lekë në 69.23 miliardë lekë, me një shtesë prej 10.29 miliardë lekësh, ose 17.4 për qind, pas ndryshimeve të bëra në buxhet në mesin e vitit.
Rritja më e madhe është orientuar drejt programit “Forcat e Luftimit”, financimi i të cilit është zgjeruar nga 31.39 miliardë lekë në rreth 40.4 miliardë lekë, ose me më shumë se 9 miliardë lekë.
Rreth 88 për qind e të gjithë shtesës buxhetore të Ministrisë së Mbrojtjes është përqendruar pikërisht në këtë program. Struktura e shpenzimeve tregon se në buxhetin e rishikuar për vitin 2026 prioriteti është zhvendosur drejt forcimit të kapaciteteve luftarake dhe investimeve në pajisje, teknologji, infrastrukturë dhe gatishmëri operacionale.
k.jpg)