Energjia, shqiptarët paguan 4.5 mln euro kamatëvonesa deri në qershor për faturat jashtë afatit
Rreth 449.5 milionë lekë kamatëvonesa u paguan në gjashtë muajt e parë të 2026 për faturat e energjisë.
Konsumatorët e energjisë elektrike paguan rreth 449.5 milionë lekë, ose afërsisht 4.5 milionë euro, kamatëvonesa gjatë gjashtë muajve të parë të vitit 2026, për faturat e shlyera përtej afatit. Të dhënat për periudhën janar-qershor tregojnë se kamatëvonesat u arkëtuan mbi rreth 2.21 milionë fatura energjie.
Vlera më e lartë mujore e kamatëvonesave u regjistrua në maj, me 82.9 milionë lekë. Në prill u arkëtuan 81.4 milionë lekë, ndërsa në qershor 75.9 milionë lekë. Në mars, kamatëvonesat arritën në 73.6 milionë lekë, në janar në 72.8 milionë lekë, ndërsa niveli më i ulët i periudhës u regjistrua në shkurt, me 62.9 milionë lekë.
Mbi 410 mijë fatura me kamatëvonesë në qershor
Edhe numri i faturave mbi të cilat u arkëtua kamatëvonesë ishte më i lartë në fund të periudhës. Në qershor rezultuan 410,833 fatura të tilla, niveli më i lartë i gjashtëmujorit. Në mars u regjistruan 383,493 fatura, në prill 386,868 dhe në maj 375,727. Janari regjistroi 341,330 fatura me kamatëvonesë, ndërsa shkurti kishte numrin më të ulët, me 311,765.
Në të njëjtën periudhë, numri i konsumatorëve të energjisë elektrike u luhat në rreth 1.37–1.38 milionë. Në fund të qershorit, të dhënat raportojnë rreth 1.38 milionë konsumatorë.
Kur aplikohet kamatëvonesa për faturën e energjisë
Kamatëvonesat aplikohen kur fatura mujore e energjisë elektrike nuk paguhet brenda afatit përkatës. Konsumatori mund ta paguajë faturën pa kamatë deri në mbyllje të muajit pasardhës, ndërsa pas tejkalimit të këtij afati mbi detyrimin nis aplikimi i kamatëvonesës.
Paralelisht, OSHEE vijon të administrojë edhe detyrimet e prapambetura të konsumatorëve që kanë lidhur aktmarrëveshje për shlyerjen e borxheve të akumuluara ndër vite. Për vitin 2026, kompania ka ofruar skema lehtësuese për klientët që shlyejnë detyrimet, përfshirë reduktime të kamatëvonesave sipas kategorisë së konsumatorit.
k.jpg)