Shqipëria drejt gazit të TAP-it, pika e daljes në Fier pritet të përfundojë në fund të 2027
Operatori i Gazsjellësit Trans-Adriatik (TAP), TAP AG, ka përcaktuar tremujorin e katërt të vitit 2027 si afatin e planifikuar për përfundimin e impiantit të matjes së gazit dhe reduktimit të presionit në jug të Fierit.
Infrastruktura do t'i dorëzohet qeverisë shqiptare pas përfundimit.
Sipas TAP AG, projekti i pikës së daljes në jug të Fierit parashikon ndërtimin e një impianti për matjen e gazit dhe reduktimin e presionit pranë stacionit të kompresimit ACS03, në afërsi të Fierit. Kompania po bashkëpunon me qeverinë shqiptare dhe kompaninë shtetërore Albgaz për krijimin e një pike hyrjeje dhe daljeje në këtë zonë.
“Data e planifikuar për përfundimin e impiantit të matjes së gazit dhe reduktimit të presionit është tremujori i katërt i vitit 2027”, bëri të ditur kompania.
Zgjerohet kapaciteti i TAP-it
Si pjesë e projektit të zgjerimit të nivelit të parë të TAP-it, rreth 1.04 miliardë metra kub në vit kapacitet shtesë afatgjatë transporti u bë i disponueshëm ndërmjet Kipoi-t dhe Italisë më 1 janar 2026. Një kapacitet tjetër afatgjatë prej rreth 0.16 miliardë metra kub në vit u alokua nga 1 tetori 2026 për hyrjen nga sistemi i DESFA-s dhe daljen në një pikë të re në Roskovec, Shqipëri.
Gjithashtu, nga 1 tetori 2026, pika e interkonjeksionit Nea Mesimvria u bë dykahëshe, duke u kthyer në pikën e dytë fizike të hyrjes në sistemin TAP. Sipas kompanisë, kjo mundëson rrjedhjen e gazit në të dy drejtimet ndërmjet TAP-it dhe sistemit grek të transmetimit të gazit natyror, duke rritur integrimin e tregjeve dhe fleksibilitetin në varësi të kushteve të tregut.
Që nga vënia në funksion e Gazsjellësit Trans-Adriatik, përmes tij janë transportuar 61.4 miliardë metra kub gaz drejt vendeve europiane.
k.jpg)