Miratohet me 85 vota pro ndarja e re territoriale, 46 bashki dhe 71 qytete
Kuvendi miratoi reformën territoriale me 85 vota pro, duke ulur numrin e bashkive nga 61 në 46.
Kuvendi i Shqipërisë miratoi në orët e para të mëngjesit, me 85 vota pro, projektligjin “Për ndarjen administrativo-territoriale të njësive të qeverisjes vendore në Republikën e Shqipërisë”. Pas një seance maratonë, ligji u miratua me shumicë të cilësuar, duke përcaktuar një organizim të ri territorial që redukton numrin e bashkive nga 61 në 46, ndërsa 12 qarqet ekzistuese mbeten të pandryshuara.
Sipas ndarjes së re, 15 bashki humbasin statusin e tyre dhe bashkohen me njësi më të mëdha vendore. Nga 61 bashkitë aktuale, 33 do të mbeten të pandryshuara, ndërsa 28 të tjera përfshihen në procesin e riorganizimit territorial. Reforma synon përmirësimin e administrimit të territorit, menaxhimit të financave vendore dhe ofrimit të shërbimeve publike për qytetarët.
Cilat janë 15 bashkitë që humbasin statusin?
Bashkitë që humbasin statusin sipas hartës së re territoriale janë Fushë-Arrëzi, Klosi, Rrogozhina, Dimali, Poliçani, Patosi, Divjaka, Selenica, Maliqi, Këlcyra, Memaliaj, Libohova, Cërriku, Belshi dhe Prrenjasi.
Sipas organizimit të ri, Fushë-Arrëzi do t’i bashkohet Bashkisë Pukë, Klosi Bashkisë Mat, ndërsa Rrogozhina do të përfshihet në Bashkinë Kavajë. Në qarkun e Beratit, bashkitë Dimal dhe Poliçan do të bashkohen me Bashkinë Berat.
Ndryshime parashikohen edhe në qarkun e Elbasanit, ku Cërriku dhe Belshi do t’i bashkohen Bashkisë Elbasan, ndërsa Prrenjasi do të bashkohet me Bashkinë Librazhd. Në qarkun e Fierit, Patosi do të përfshihet në Bashkinë Fier, ndërsa Divjaka në Bashkinë Lushnjë.
46 bashki, 71 qytete dhe 387 njësi administrative
Me ndarjen e re, territori i Shqipërisë do të organizohet në 46 bashki, 71 qytete përbërëse dhe 387 njësi administrative. Bashkitë do të vijojnë të funksionojnë me një kryetar, një këshill bashkiak, një administratë dhe një buxhet të vetëm, ndërsa qytetet përbërëse do të kenë rol në koordinimin administrativ dhe organizimin e shërbimeve.
Reforma synon gjithashtu forcimin e autonomisë financiare të pushtetit vendor, rritjen e kapaciteteve administrative dhe përshtatjen e organizimit territorial me ndryshimet demografike dhe kërkesat e procesit të integrimit.
Debate në Kuvend dhe protesta kundër reformës
Miratimi i ndarjes së re territoriale erdhi pas një seance të gjatë parlamentare, të shoqëruar me debate mes mazhorancës dhe opozitës lidhur me hartën e re të njësive vendore. Ndërkohë, jashtë godinës së Kuvendit u zhvilluan protesta kundër riorganizimit territorial.
Me miratimin e projektligjit, Shqipëria kalon drejt një strukture të re të qeverisjes vendore, me më pak bashki dhe me një organizim që synon përqendrimin e kapaciteteve administrative dhe financiare në njësi më të mëdha.
k.jpg)