Nafta ulet me 4 lekë për litër, Bordi cakton çmimet e reja
Nafta do të shitet me 213 lekë për litër, ndërsa benzina me 194 lekë. Çmimet e reja hyjnë në fuqi më 9 tetor, në orën 13:00.
Bordi i Transparencës ka vendosur uljen me 4 lekë për litër të çmimit të naftës, duke e çuar në 213 lekë për litër në pikat e shitjes me pakicë. Vendimi i marrë më 9 tetor 2026 përcakton kufijtë maksimalë të tregtimit të karburanteve, të cilët hyjnë në fuqi në orën 13:00 dhe do të mbeten të vlefshëm deri në mbledhjen e ardhshme të Bordit.
Sipas vendimit, çmimi maksimal i shitjes me pakicë për naftën është 213 lekë për litër, ndërsa çmimi i shitjes me shumicë nuk duhet të kalojë 201 lekë për litër. Për benzinën, çmimi maksimal i shitjes me pakicë është caktuar në 194 lekë për litër, ndërsa tregtimi me shumicë nuk duhet të kalojë 182 lekë për litër.
Çmimet e reja hyjnë në fuqi më 9 tetor, në orën 13:00
Bordi i Transparencës e mori vendimin në mbështetje të kuadrit ligjor për tregtimin e hidrokarbureve dhe vendimit të Këshillit të Ministrave nr. 711, datë 16 shtator 2026, për shpalljen e situatës së veçantë në tregun e hidrokarbureve.
Autoritetet u kanë kërkuar operatorëve të tregtimit me shumicë dhe pakicë të zbatojnë detyrimisht çmimet maksimale të përcaktuara. Në rast të konstatimit të shkeljeve, parashikohet pezullimi i aktivitetit të operatorëve që nuk respektojnë vendimin.
Ministria e Ekonomisë dhe Inovacionit, Ministria e Financave dhe Ministria e Infrastrukturës dhe Energjisë kanë deklaruar se mbeten të angazhuara për mbrojtjen e interesave të konsumatorëve dhe garantimin e konkurrencës së ndershme në tregun e hidrokarbureve.
Çmimet e miratuara do të zbatohen deri në vendimin e ardhshëm të Bordit të Transparencës, i cili do të shqyrtojë sërish ecurinë e tregut dhe ndryshimet e mundshme të çmimeve të karburanteve.
k.jpg)