Shpenzimet për shportën ushqimore, Durrësi të njëjta çmime me Tiranën, Lezha më lirë

16-10-2026

Çmimet e pesë produkteve bazë ushqimore ndryshojnë ndjeshëm mes qyteteve, me diferenca mbi 1 mijë lekë.

Çmimi i së njëjtës shportë me pesë produkte bazë ushqimore mund të ndryshojë me mbi 1 mijë lekë brenda të njëjtit qytet, ndërsa diferenca të konsiderueshme vërehen edhe ndërmjet qyteteve të ndryshme të Shqipërisë. Krahasimi i çmimeve tregon se konsumatorët mund të përballen me shpenzime shumë të ndryshme për blerjen e produkteve të përditshme, në varësi të çmimeve të raportuara për secilin artikull.

Monitor ka llogaritur vlerën e një shporte ushqimore që përfshin pesë produkte bazë: miell, oriz, makarona, vaj luledielli dhe sheqer. Krahasimi është realizuar për tetë qytete të vendit, Tiranë, Durrës, Elbasan, Fier, Vlorë, Shkodër, Lezhë dhe Sarandë, duke u mbështetur në çmimet e publikuara në platformën “Pasqyra e Çmimeve”.

Sipas përllogaritjeve, Fieri regjistron vlerën minimale më të lartë të shportës, me 508 lekë, ndërsa në Tiranë, Durrës dhe Sarandë vlera minimale arrin në 429 lekë. Ndërkohë, vlera maksimale e pesë produkteve në qytetet e analizuara varion nga 1.133 lekë deri në 1.535 lekë.

Diferenca ndërmjet vlerave minimale të shportës në tetë qytetet është 79 lekë, ndërsa ndërmjet vlerave maksimale arrin në 402 lekë. Megjithatë, ndryshimet më të mëdha vërehen brenda të njëjtit qytet, ku shporta me çmimet më të larta mund të kushtojë mbi 1 mijë lekë më shumë se ajo me çmimet minimale.

Tirana dhe Durrësi, diferencë prej 1.106 lekësh mes shportës më të lirë dhe më të shtrenjtë

Në Tiranë, shpenzimet minimale për blerjen e pesë produkteve bazë ushqimore llogariten në 429 lekë, ndërsa vlera maksimale arrin në 1.535 lekë. Diferenca ndërmjet dy vlerave është 1.106 lekë.

E njëjta situatë paraqitet edhe në Durrës, ku shporta minimale kushton 429 lekë dhe ajo maksimale 1.535 lekë, duke regjistruar gjithashtu një diferencë prej 1.106 lekësh.

Në të dy qytetet, çmimi i miellit varion nga 60 deri në 219 lekë për kilogram, ndërsa orizi kushton nga 75 deri në 419 lekë për kilogram. Makaronat variojnë nga 59 deri në 179 lekë për pako, vaji i lulediellit nga 170 deri në 419 lekë për litër dhe sheqeri nga 65 deri në 299 lekë për kilogram.

Këto intervale tregojnë se diferencat e çmimeve për të njëjtat kategori produktesh janë të konsiderueshme, veçanërisht për orizin, vajin e lulediellit dhe sheqerin.

Fieri me shportën minimale më të shtrenjtë, Vlora arrin deri në 1.535 lekë

Në Fier, vlera minimale e shportës ushqimore arrin në 508 lekë, duke qenë më e larta ndër tetë qytetet e përfshira në krahasim. Vlera maksimale është 1.535 lekë, me një diferencë prej 1.027 lekësh ndërmjet dy niveleve.

Çmimi i miellit në Fier varion nga 129 deri në 219 lekë për kilogram, ndërsa orizi nga 85 deri në 419 lekë për kilogram. Makaronat kushtojnë nga 59 deri në 179 lekë, vaji i lulediellit nga 170 deri në 419 lekë për litër dhe sheqeri nga 65 deri në 299 lekë për kilogram.

Në Vlorë, shporta me çmimet minimale kushton 434 lekë, ndërsa ajo me çmimet maksimale arrin në 1.535 lekë. Diferenca ndërmjet dy vlerave është 1.101 lekë.

Në këtë qytet, mielli varion nga 70 deri në 219 lekë për kilogram, orizi nga 75 deri në 419 lekë për kilogram, makaronat nga 59 deri në 179 lekë për pako, vaji i lulediellit nga 170 deri në 419 lekë për litër dhe sheqeri nga 65 deri në 299 lekë për kilogram.

Saranda dhe Shkodra, diferenca deri në 974 lekë për pesë produkte

Në Sarandë, vlera minimale e shportës ushqimore është 429 lekë, ndërsa vlera maksimale arrin në 1.403 lekë. Diferenca ndërmjet dy niveleve është 974 lekë.

Çmimi i miellit në Sarandë varion nga 70 deri në 219 lekë për kilogram, orizi nga 75 deri në 289 lekë për kilogram, makaronat nga 59 deri në 179 lekë për pako, vaji i lulediellit nga 170 deri në 419 lekë për litër dhe sheqeri nga 65 deri në 299 lekë për kilogram.

Në Shkodër, shporta minimale kushton 471 lekë, ndërsa ajo maksimale arrin në 1.391 lekë, duke krijuar një diferencë prej 920 lekësh.

Në këtë qytet, mielli kushton nga 85 deri në 155 lekë për kilogram, orizi nga 159 deri në 419 lekë për kilogram, makaronat nga 79 deri në 179 lekë, vaji i lulediellit nga 179 deri në 419 lekë për litër dhe sheqeri nga 69 deri në 219 lekë për kilogram.

Krahasuar me qytetet e tjera, Shkodra paraqet një çmim minimal më të lartë për orizin, prej 159 lekësh për kilogram, ndërsa çmimi maksimal i sheqerit është më i ulët, në 219 lekë për kilogram.

Elbasani dhe Lezha me shportën maksimale më të lirë

Elbasani dhe Lezha regjistrojnë vlerën maksimale më të ulët të shportës ushqimore ndër tetë qytetet e analizuara, me 1.133 lekë.

Në Elbasan, vlera minimale e pesë produkteve është 439 lekë, ndërsa ajo maksimale arrin në 1.133 lekë, duke krijuar një diferencë prej 694 lekësh.

Çmimi i miellit në Elbasan varion nga 70 deri në 219 lekë për kilogram, orizi nga 75 deri në 240 lekë për kilogram, makaronat nga 59 deri në 170 lekë për pako, vaji i lulediellit nga 170 deri në 205 lekë për litër dhe sheqeri nga 65 deri në 299 lekë për kilogram.

Në Lezhë, shporta minimale kushton 459 lekë dhe ajo maksimale 1.133 lekë, me një diferencë prej 674 lekësh, më e ulëta ndër qytetet e përfshira në krahasim.

Në këtë qytet, çmimi i miellit varion nga 70 deri në 219 lekë për kilogram, orizi nga 75 deri në 240 lekë për kilogram, makaronat nga 79 deri në 170 lekë për pako, vaji i lulediellit nga 170 deri në 205 lekë për litër dhe sheqeri nga 65 deri në 299 lekë për kilogram.

Në të dy qytetet, intervali i çmimit të vajit të lulediellit është më i ngushtë se në Tiranë, Durrës, Fier, Vlorë dhe Sarandë, ku çmimi maksimal i raportuar arrin në 419 lekë për litër.

Orizi dhe vaji i lulediellit, ndër produktet me diferencat më të mëdha të çmimeve

Krahasimi i pesë kategorive ushqimore tregon se ndryshimet më të theksuara të çmimeve vërehen te orizi dhe vaji i lulediellit.

Në Tiranë dhe Durrës, çmimi i orizit varion nga 75 deri në 419 lekë për kilogram, ndërsa në Elbasan dhe Lezhë intervali është nga 75 deri në 240 lekë. Në Shkodër, çmimi minimal i orizit është 159 lekë për kilogram, ndërsa ai maksimal arrin në 419 lekë.

Edhe vaji i lulediellit paraqet diferenca të konsiderueshme. Në Elbasan dhe Lezhë, çmimi varion nga 170 deri në 205 lekë për litër, ndërsa në Tiranë, Durrës, Fier, Vlorë dhe Sarandë intervali shtrihet nga 170 deri në 419 lekë për litër.

Ndryshime vërehen edhe te sheqeri. Në shumicën e qyteteve, çmimi varion nga 65 deri në 299 lekë për kilogram, ndërsa në Shkodër intervali është nga 69 deri në 219 lekë.

Vlerat e shportës janë përllogaritur si shuma aritmetike e çmimeve minimale dhe maksimale të raportuara për secilin produkt në platformën “Pasqyra e Çmimeve”. Për këtë arsye, ato përfaqësojnë kufijtë e çmimeve të publikuara dhe jo domosdoshmërisht koston e një shporte që mund të blihet e plotë në të njëjtin dyqan.

Për një krahasim të plotë të kostos reale të blerjeve duhet të merren parasysh edhe marka, karakteristikat, paketimi i produkteve dhe disponueshmëria e tyre në pikat përkatëse të shitjes.

Burimi: Monitor