Katër kala historike hapen për investime private, kontrata deri në 20 vjet

Ministria e Turizmit hap konkurrimin për ambiente shërbimi në kalatë e Rozafës, Kaninës, Prezës dhe Petrelës.

Ministria e Turizmit, Kulturës dhe Sportit ka hapur konkurrimin për dhënien në përdorim të 700 metrave katrorë ambiente shërbimi në katër kala historike të vendit. Bëhet fjalë për kalatë e Rozafës, Kaninës, Prezës dhe Petrelës, ku operatorët privatë do të kenë mundësi të realizojnë investime për rijetësimin e hapësirave të përcaktuara, përmes kontratave me afat deri në 20 vjet dhe me të drejtë rinovimi.

Katër procedurat janë publikuar në Buletinin e Njoftimeve Zyrtare të datës 19 tetor 2026 dhe synojnë rijetësimin e ambienteve të shërbimit brenda monumenteve të kulturës të kategorisë së parë. Investimet për realizimin e projekteve do të financohen nga operatorët që shpallen fitues të konkurrimit.

Sipërfaqja më e madhe e ofruar ndodhet në Kalanë e Kaninës, në Vlorë, ku konkurrimi përfshin një ambient shërbimi prej 300 metrash katrorë. Në Kalanë e Rozafës, në Shkodër, është përcaktuar një hapësirë prej 200 metrash katrorë, e vendosur në oborrin e tretë të monumentit.

Ndërkohë, dy procedurat e tjera përfshijnë nga 100 metra katrorë ambiente shërbimi në oborret e kalave të Prezës dhe Petrelës, në zonën e Tiranës.

Ministria ka përcaktuar se objekt i konkurrimit është dhënia në përdorim vetëm e ambienteve të identifikuara të shërbimit dhe jo e kalave në tërësinë e tyre. Të katër pasuritë gëzojnë statusin e monumentit të kulturës, ndaj çdo ndërhyrje dhe veprimtari në këto hapësira duhet të jetë në përputhje me legjislacionin për mbrojtjen e trashëgimisë kulturore.

Kontrata deri në 20 vjet, çfarë kushtesh duhet të plotësojnë investitorët?

Subjektet që synojnë të marrin në përdorim ambientet e shërbimit duhet të dëshmojnë kapacitete të mjaftueshme financiare, teknike dhe profesionale për realizimin e investimeve të propozuara dhe administrimin e pasurive kulturore.

Një nga kriteret kryesore është paraqitja e një garancie financiare për miradministrimin e pronës, e cila nuk duhet të jetë më e ulët se 10 për qind e vlerës së investimit të propozuar.

Gjithashtu, operatorët duhet të kenë një xhiro mesatare vjetore gjatë tre viteve të fundit të paktën sa 50 për qind e vlerës së investimit që parashikojnë të realizojnë.

Kontratat për dhënien në përdorim të ambienteve mund të kenë një kohëzgjatje deri në 20 vjet, me të drejtë rinovimi, ndërsa financimi i investimeve do të sigurohet nga vetë subjektet fituese.

Si do të vlerësohen projektet për rijetësimin e kalave?

Projektet e paraqitura nga operatorët do të vlerësohen mbi bazën e një sistemi me 100 pikë, ku rëndësi të veçantë do të kenë ruajtja e monumenteve, niveli i investimit dhe cilësia e projektit të rijetësimit.

Sipas kritereve të përcaktuara, planet për ndërhyrje ruajtëse dhe mbrojtëse vlerësohen me 20 pikë, niveli i investimit me 20 pikë dhe cilësia e projektit të rijetësimit me 20 pikë. Këto tre kritere përfaqësojnë së bashku 60 pikë nga vlerësimi total.

Pjesa tjetër e pikëve lidhet me përputhshmërinë e veprimtarisë së propozuar me funksionin dhe vlerat kulturore të monumentit, promovimin e trashëgimisë kulturore, garantimin e aksesit publik dhe cilësinë e shërbimeve që do të ofrohen.

Operatorët fitues duhet të sigurojnë gjithashtu burime financiare vjetore për ruajtjen dhe mirëmbajtjen e pasurive kulturore. Në rastet kur në hapësirat e përfshira në projekte evidentohen vlera ose gjurmë arkeologjike, kërkohet edhe sigurimi i financimeve të nevojshme për realizimin e studimeve përkatëse.

Këto kushte synojnë që përdorimi i ambienteve për veprimtari shërbimi të realizohet duke respektuar karakteristikat historike dhe kulturore të monumenteve, si dhe duke garantuar aksesin e publikut.

Afati për dorëzimin e ofertave, 12 nëntor 2026

Subjektet e interesuara për të investuar në ambientet e shërbimit të kalave të Rozafës, Kaninës, Prezës dhe Petrelës duhet të dorëzojnë ofertat e tyre brenda datës 12 nëntor 2026, ora 10:00.

Procedurat e konkurrimit përfshijnë një sipërfaqe totale prej 700 metrash katrorë, të shpërndarë në katër monumente kulture të kategorisë së parë. Projektet do të financohen nga operatorët privatë, ndërsa përdorimi i hapësirave do të kushtëzohet nga respektimi i kërkesave ligjore për mbrojtjen dhe administrimin e trashëgimisë kulturore.

Burimi: Monitor

Më të lexuarat