Bien cmimet e apartamenteve ne bregdet, rriten per fshatrat turistike

Teksa kërkesa për shtëpitë e pushimit në apartamente është tkurrur ndjeshëm dhe çmimet janë në tendencë rënëse krahasuar me një vit më parë, ideja e blerjes së një shtëpie në një fshat turistik po lulëzon së tepërmi, e shoqëruar me çmime më të kripura.

Apartamentet në bregdet mund të konsiderohen si një pjesë e vjetër e dëshirave të shqiptarëve, të cilët në bumin e fillimviteve 2000, kërkonin të kishin një shtëpi të dytë pushimi, për sezonin veror. Tashmë, interesi është zhvendosur drejt fshatrave turistikë, ku sipas ekspertëve, infrastruktura e mirë, hapësirat e gjelbra, siguria janë arsyet kryesore që apartamentet unike nuk janë më të dëshiruara, po përkundrazi, të gjithë po përpiqen t’i shesin.

Përpjekjet më të mëdha për të “hequr qafe” shtëpitë e dyta në plazh, sipas ekspertëve të fushës, po ndodhin në Durrës. Ing. Xheni Jahja nga “Tirana Real Estate”, tregon se interesi për blerje të reja në atë zonë është thuajse zero, ndërkaq që çmimet janë në tendencë rënëse, por edhe zotëruesit aktualë të apartamenteve kërkojnë thuajse me ngulm shitjet e tyre, ndaj “pazaret” për çmime më të ulëta janë normale. Ing. Jahja tregon se edhe Shëngjini është një tjetër zonë, me çmimin thuajse më të ulët, por që kërkesat edhe këtë vit kanë qenë të “fjetura” dhe sporadike.

Ndërsa, drejtuesi i “Dev Information”, z. Dritan Caka, tregon se ky interes për fshatrat turistikë duket me një rritje prej 10% këtë vit, duke pohuar sigurisht se janë blerje elitare për shkak të çmimeve më të larta, por që kjo pjesë po ndikon në uljen e kërkesës në apartamentet unike, pasi i konkurron fort me shumë elemente si siguria, infrastruktura etj. Z. Caka pohon se tendenca rënëse e çmimeve për apartamentet unike në të gjithë Shqipërinë po vjen edhe nga ndërtimet e reja të fshatrave turistikë, sidomos ato në Jug të vendit, ku interesi është më i lartë, por edhe Gjiri i Lalëzit po qëndron fort në dëshirat e shqiptarëve.

Sa u përket çmimeve të zonave kryesore në vendin tonë, ato kanë lëvizur shumë pak për fshatrat turistikë (në rritje), por për zonat e tjera kanë mbetur disi të njëjta, me ulje kryesisht në zonën e vijës bregdetare të Durrësit.Sipas ekspertëve të tregut imobiliar, tri janë arsyet kryesore për uljen e kërkesës për shtëpi unike në bregdet: zhvillimi i zgjedhjeve lokale, mungesa e të huajve, si dhe ‘lulëzimi’ i fshatrave turistikë (çmimi në të cilat po rritet).

Akil Danushaj, agjent imobiliar i zonës së Vlorës për “Century 21” tregon për “Monitor” se kërkesat në këtë zonë janë të dobëta, por çmimet nuk kanë lëvizur. Këtë ulje kërkese ai ia atribuon arsyeve ekonomike. Sipas tij, situata e përgjithshme e vështirë në Shqipëri ka një ndikim të madh, por ka rënë interesi edhe nga vendet fqinje ku punojnë emigrantët shqiptarë, të cilët kanë qenë blerësit potencialë.

Tendenca e shtëpive në bregdet

-Çmimet për apartamente janë në tendencë rënëse. Ekspertët e tregut pohojnë rënie me 35% të kërkesës në zona si vija bregdetare e Durrësit, Golemi, Shkëmbi i Kavajës, ku çmimet janë më të ulëta dhe koha tani është ideale për ‘pazare’ për çmimin

-Vlora vijon të mbetet me çmimet më të larta në apartamentet unike, ndonëse kërkesa është e njëjtë me vitin e shkuar
-Vëmendja ka shkuar të fshatrat turistikë. E udhëheq listën për nga kërkesa Gjiri i Lalëzit, ndjekur nga kompleksi i Qerretit, sidomos për banorët e Tiranës, pohojnë ekspertët. Sipas tyre, arsyet janë infrastruktura e mirë, hapësirat e gjelbra dhe siguria që shtyjnë qytetarët të bëjnë blerje të tilla.
-Projekte të reja të fshatrave turistikë po vijnë, duke ofruar kështu mundësi për blerje dhe pritet sërish një rritje interesi për to, e shoqëruar nga një rënie interesi për apartamentet unike dhe njëkohësisht një rënie e çmimit për to.
-Zhvillimi i zgjedhjeve lokale këtë vit pritet të frenojë blerjet e shtëpive në bregdet dhe konsiderohet një ndër arsyet për rënien e kërkesës këtë vit, duke i shtuar kësaj liste edhe mungesën e të huajve që kanë ulur kërkesën.

Çmimet e apartamenteve në bregdet, sipas zonave:
Shëngjini: 350 – 500 euro/m²
Durrësi (zona e plazhit, Golemi): 350 – 500 euro/m²
Gjiri i Lalëzit (fshatra turistikë): 900 – 1200 euro/m²
Qerreti (fshatra turistikë): 800 – 1000 euro/m²
Vlora: Mbi 800 euro/m²
Uji i Ftohtë: 450 – 700 euro/m²
Orikum – Radhimë: 650 – 1000 euro/m²
Dhërmiu: 800 – 1000 euro/m²
Himara: 600 – 800 euro/m²
Burimi: Monitor

Më të lexuarat