Bie ritmi i investimeve kapitale: Vetem 30 per qind e fondit vjetor i shpenzuar

Situata fiskale e qeverisë sidomos në drejtim të të ardhurave buxhetore ka shënuar përmirësim në 7-mujorin e 2021, pasi të ardhurat totale u realizuan në masën 102%.

Rikthimi në normalitet i ekonomisë dhe sidomos rritja e importeve të mallrave me çmime të larta i ka ndikuar pozitivisht arkëtimet nga TVSH, mirëpo në krahun tjetër shpenzimet, sidomos investimet po realizohen shumë më pak se, programimi. Gjatë periudhës janar-korrik 2021, në buxhet ishin planifikuar të shpenzoheshin 62,7 miliardë lekë fonde për investime, por në fakt u alokuan vetëm 39.6 miliardë lekë. Siç shihet plani i investimeve për periudhën 7-mujore nuk është realizuar në 35.6%, teksa qeveria në fillim të muajit korrik e ndryshoi buxhetin e vitit 2021 duke shtuar shpenzimet për investime me gati 100 milionë euro të tjera.

Siç shihet nga të dhënat, fondi i investimeve kapitale rrezikon të përqendrohet për disbursim në muajt e fundit të vitit, një praktikë e njohur tashmë, por që vë në diskutim efiçencën e përdorimit të tyre. Me rishikimin e buxhetit 2021 qeveria e çoi zërin e shpenzimeve kapitale në rreth 132 miliardë lekë ose mbi 1 miliardë euro, nga 121 miliardë lekë që ishin më parë. Kjo është vlera më e madhe e investimeve e dhënë ndonjëherë gjatë këtyre viteve të tranzicionit.

Deri në fund të muajit korrik është shpenzuar vetëm 30% e fondi vjetor të investimeve kapitale. Shpenzimet kapitale që kryesisht shkojnë për financimin e PPP dhe investimeve buxhetorë në rrugë kanë arritur nivelin më të lartë historik në vlera neto. Fondi total për shpenzimet kapitale do të arrijë këtë vit në 7.6% të PBB-së nga 5% që është kufiri i rekomanduar nga FMN për të ruajtur stabilitetin fiskal dhe rritjen e qëndrueshme. Në vijimësi, pas vitit 1990, qeveritë kanë financuar disa projekte investimesh me borxh, produktiviteti i të cilave ka qenë e diskutueshëm.

Ketë vit qeveria nëpërmjet një akti normativ vendosi të rrisë më tej deficitin buxhetor në qershor të 2021, në nivelin 120,5 mld lekë, nga 108 mld lekë që ishte planifikuar në fillim të vitit. Pothuajse e gjitha shtesa e deficitit shkoi për zërin e investimeve dhe praktikisht financime shtesë prej 4.8 mld lekësh për projektet në infrastrukturë në programin “Transporti Rrugor”, ku përfshihen hapja e loteve të reja për “Ndërtimin e segmentit rrugor Unaza Veriore Tiranë”, “Ndërtimi i segmentit rrugor Sheshi Shqiponja-Bulevardi i ri” dhe projektet aktuale të Unazës së Tiranës, të cilat kanë avancuar me punimet mbi planin buxhetor të miratuar për vitin buxhetor 2021.

Ndryshimet në buxhet miratuan financimin shtesë prej 3 miliardë lekësh për projektet në vazhdim, të programeve të zhvillimit dhe një financimin shtesë prej 2.5 miliardë lekësh për projektet në vazhdim për sektorin e ujësjellës-kanalizimeve. 1 miliardë lekë të tjera u akorduan për financim shtesë prej 1 miliard lekësh për projektin në vazhdim me financim të huaj “Ndërtim By-Pass i Vlorës”./Burimi: Monitor

Më të lexuarat