Arben Ahmetaj: Zhbllokohen lejet e ndertimit

Ministri i Ekonomisë, Arben Ahmetaj, deklaron se pezullimi i lejeve të ndërtimit, që uli Shqipërinë në renditjen botërore të të bërit biznes, ishte masë e domosdoshme.

“Me ndërmarrjen e reformës territoriale, Këshilli Kombëtar i Territorit ka marrë vendimin për pezullimin e përkohshëm të lejeve të ndërtimit, me qëllim harmonizimin e instrumenteve të planifikimit lokal në kuadër të ndarjes së re administrative territoriale, dhe për një arsye tjetër, disiplinimin e ndërtimeve në Republikën e Shqipërisë. Sigurisht sot, sidomos Bashkia e Tiranës dhe e Durrësit”, tha Ahmetaj.

Por në javët që vijnë, premtoi Ahmetaj, procesi i lejeve të ndërtimit do të hapet në bazë të ligjit të ri. “Kjo është një qasje afatgjatë për zhvillimin urban, planifikimin e zhvillimin e territorit dhe zhvillimin ekonomik të rajoneve gjithashtu, dhe ne jemi të bindur që në raportin e vitit të ardhshëm kjo reformë do të gjejë reflektim të drejtpërdrejtë në përmirësimin e indikatorit”, tha Ahmetaj.

Më të lexuarat