Pavaresisht kerkeses, KFOR nuk mbyll hapesiren ajrore te Kosoves

Hapësira ajrore mbi Kosovën mbetet e hapur për avionët rusë, pavarësisht kërkesës së institucioneve kosovare ndaj KFOR-it për të mbyllur atë.

Këtë e bëri të ditur për KosovaPress, zyrtari për medie në KFOR, Daniele Riggio, duke iu referuar një “zyrtari të NATO, ka thënë se KFOR mbetet i fokusuar në zbatimin e përditshëm të mandatit të tij të OKB për të siguruar mjedis të sigurtë dhe liri të lëvizjes për të gjitha komunitetet që jetojnë në Kosovë.

“Hapësira ajrore mbi Kosovën mbetet e hapur. Komandanti i KFOR ruan autoritetin parësor për përdorimin e hapësirës ajrore mbi Kosovë, sipas Rezolutës 1244 të Këshillit të Sigurimit të Kombeve të Bashkuara të vitit 1999.

KFOR-i mbetet plotësisht i fokusuar në zbatimin e përditshëm të mandatit të tij të OKB-së për të siguruar mjedis të sigurtë dhe liri të lëvizjes për të gjitha komunitetet që jetojnë në Kosovë”, tha ai duke iu referuar deklaratës së zyrtarit të NATO-s.

Ministrja e Punëve të Jashtme dhe Diasporës, Donika Gërvalla, sot bëri të ditur se kanë parashtruar kërkesë ndaj KFOR-it që të mbyllë hapësirën ajrore të Kosovës për avionët rusë./Burimi: Telegrafi.

Më të lexuarat