Guvernatori i BSH: Kriza e cmimeve do vijoje edhe ne 2023

Këshilli Mbikëqyrës i Bankës së Shqipërisë deklaron se kriza e çmimeve të larta do të vijojë edhe përgjatë vitit të ardhshëm.

Guvernatori Gent Sejko shprehet se shkak i rritjes së çmimeve në tregjet ndërkombëtare janë bërë sanksionet e vendosura ndaj Rusisë dhe luftës në Ukrainë. Sa i përket inflacionit, Sejko deklaroi se do të qëndrojë mbi objektivin e Bankës së Shqipërisë, ndërsa norma e interesit u rrit me 0.5 pikë përqindje.

Çmimet do të vijojnë të mbeten të larta përgjatë gjithë këtij viti dhe për vitin e ardhshëm. Kështu paralajmëroi Guvernatori i Bankës së Shqipërisë në një konferencë për mediet ku paraqiti vendimet e Këshillit të Mbikëqyrjes.

“Të dhënat që vijnë nga tregjet e huaja sinjalizojnë se çmimet në tregjet ndërkombëtare do të vijojnë të mbeten të larta gjatë viteve 2022 dhe 2023. Këto çmime të larta do të gërryejnë fuqinë blerëse të familjeve dhe do të shoqërohen me ngadalësim të ritmit të rritjes në rang botëror.”

Sipas Sejkos, rritja e lartë e çmimeve ka ardhur për shkak të sanksioneve ndaj Rusisë dhe luftës në Ukrainë. Kjo situatë sipas tij është transmetuar dhe do të vijojë të reflektohet edhe në Shqipëri.

“Ekonomia botërore do të vijojë të përballet me çmime të larta të ushqimeve, të lëndëve të para dhe të produkteve bazë. Këto goditje do të transmetohen edhe në Shqipëri.”

Nga vlerësimi i bërë, Banka e Shqipërisë gjykon se ecuria e mëtejshme e çmimeve do të përcaktohet nga kohëzgjatja e këtij konflikti si dhe nga qëndrueshmëria e rritjes ekonomike në vend, e cila thuhet se do të vijojë.

Sa i përket inflacionit, Gent Sejko deklaroi se do të qëndrojë mbi objektivin e Bankës së Shqipërisë deri në tremujorin e tretë të vitit 2023, ndërsa norma e interesit u rrit me 0.5 pikë përqindje./Burimi: Oranews.tv

Më të lexuarat