Perkeqesohet ekonomia gjermane, pritet recesion i rende ne dimer
Gjendja në ekonominë gjermane është përkeqësuar ndjeshëm për shkak të reduktimit të furnizimeve me gaz nga Rusia.
Sipas ekonomistëve në dimër pritet një recesion i rëndë. Ekonomistët gjermanë mendojnë se në dimër Gjermania do të preket nga një recesion i rëndë.
Instituti Gjerman për Studime Ekonomike Ifo, i cili përgatit prognoza për zhvillimin ekonomik intervistoi gjatë muajit maj dhe qershor 9,000 menaxherë për situatën dhe perspektivat e bizneseve të tyre.
Shkak kryesor për prognozat e errëta është reduktimi i madh i furnizimeve me gaz nga Rusia, të cilat edhe mund të ndërpriten plotësisht. Të enjten qeveria gjermane shpalli gjendjen e alarmit në lidhje me rezervat e gazit.
“Rritja e çmimeve të energjisë dhe mungesa e gazit po shkaktojnë shqetësim të madh për ekonominë gjermane”, tha drejtori i institutit Ifo, Clemens Fuest. Sipas tij dhe ekonomistëve të tjerë Gjermania mund të përfshihet nga një krizë ekonomike.
Recesion i rëndë në dimër
Sipas ekonomistëve të institutit Ifo pushtimi rus i Ukrainës po shkakton rritje të çmimeve të lëndëve të para, rritje të mungesës në furnizime dhe rritje të pasigurisë midis kompanive dhe konsumatorëve.
Prandaj instituti Ifo e ka ulur parashikimin e tij për rritjen e ekonomisë gjermane këtë vit nga 3.1 në 2.5%. Për vitin e ardhshëm, rritja ekonomike pritet të përshpejtohet në 3.7%, megjithatë ekonomistët kanë frikë nga një recesion i rëndë në dimër, nëse nuk do të ketë furnizime me gaz rus.
“Situata në tregun e gazit është kërcënuese,” tha Jens Südekum, këshilltar i qeverisë gjermane dhe profesor për ekonominë ndërkombëtare në Universitetin Heinrich Heine në Dyseldorf.
“Nëse furnizimet me gaz rus do të ndërpriten, ekziston rreziku i racionimit të gazit si dhe ndërprerje e prodhimit industrial. Rezultati mund të jetë një recesion i rëndë.” – tha Jens Südekum.
Jo vetëm gazi rus
Sipas ekonomistit të Commerzbank, Jërg Krämer, situata ekonomike është më e zymtë nga sa parashikon instituti Ifo: “Situata ekonomike është e paqëndrueshme.
Nga njëra anë sepse reduktimi i mëtejshëm i furnizimeve me gaz rus mund të çojë në racionimin e gazit për industrinë gjë që do të jetë me pasoja të rënda.
Nga ana tjetër, edhe rritja masive e normave të interesit nga Banka Qendrore e SHBA ka të ngjarë të shkaktojë një recesion në SHBA.
Duke pasur parasysh të gjitha këto rreziqe në rritje, ne e kemi ulur parashikimin tonë për Gjermaninë për 2023 nga 2.5 në vetëm 1.0%.” – tha Krämer./Burimi:DW
Sipas ekonomistëve në dimër pritet një recesion i rëndë. Ekonomistët gjermanë mendojnë se në dimër Gjermania do të preket nga një recesion i rëndë.
