Hotelet me rritje edhe ne nentor, 60.7 per qind me shume te huaj

Mbyllja e vitit 2023 me një shifër rekord vizitorësh që kaloi 10 milionë, ka ndikuar pozitivisht tek strukturat akomoduese të cilat kanë pasur frekuentim më të lartë edhe në muajt e fundit.

Të dhënat e raportuara nga Instituti i Statistikave për strukturat akomoduese tregojnë se në nëntor jorezidentët në hotele u rritën me 60.7 për qind. INSTAT vlerëson se numri i vizitorëve gjithsej është rritur me 43,5%, në krahasim me Nëntor 2022.

Nga kjo numri i vizitorëve rezident është rritur me 26,0% kurse numri i vizitorëve jo-rezident është rritur me 60,3%.

Rritje ka pësuar edhe numri i netqëndrimeve që për nëntorin 2023 ishte 79,8%, në krahasim me Nëntor 2022. Numri i netë qëndrimeve nga rezident është rritur me 55,7% kurse numri i netë qëndrimeve nga jo-rezident është rritur me 97,5%.

Vizitorë

Gjatë muajit Nëntor 2023, INSTAT vlerëson se ka pasur një rritje të numrit të vizitorëve gjithsej me 43,5%, krahasuar me Nëntor2022.

“Numri i vizitorëve jo-rezident të cilët janë akomoduar në Rajonin Qendër ka shënuar rritje me 65,3%. Në Zonat Jo-bregdetare ky tregues është rritur me 65,4%, krahasuar me të njëjtën periudhë të vitit të mëparshëm.

Numri i vizitorëve jo-rezident të cilët janë akomoduar në “Hotele dhe akomodime të ngjashme” ka shënuar rritje me 60,7%” thuhet në njoftim.

Në muajin Nëntor 2023, numri më i lartë i vizitorëve rezulton: sipas rajoneve në “Rajonin Qendër“ (52,0%); sipas zonave të afërsisë me bregdetin në “Zonat Jo-bregdetare” (65,4%);

sipas llojit të strukturave akomoduese në “Hotele dhe akomodime të ngjashme” (97,1%)”, vlerëson INSTAT.

Netë qëndrime

“Gjatë muajit Nëntor 2023, numri i netë qëndrimeve gjithsej është rritur me 79,8%, në krahasim me muajin Nëntor 2022.

Numri i netë qëndrimeve të vizitorëve jo-rezident të cilët janë akomoduar në Rajonin Qendër ka shënuar rritje me 91,5%. Në Zonat Jo-bregdetare ky tregues është rritur me 2,3 herë, krahasuar me të njëjtën periudhë të vitit të mëparshëm.

Numri i netë qëndrimeve të vizitorëve jo-rezident të cilët janë akomoduar në “Hotele dhe akomodime të ngjashme” ka shënuar rritje me 98,5%.

Në muajin Nëntor 2023, numri më i lartë i netë qëndrimeve është realizuar: sipas rajoneve në “Rajonin Qendër“ (57,6%); sipas zonave të afërsisë me bregdetin në “Zonat Jo-bregdetare” (63,4%); sipas llojit të strukturave akomoduese në “Hotele dhe akomodime të ngjashme” (97,9%)”, nënvizon INSTAT.

Norma neto e shfrytëzimit

Fluksi më i lartë turistik në raport me nëntorin 2022 shihet qartë edhe nga norma neto e shfrytëzimit të dhomave dhe shtretërve që kanë pësuar rritje në nëntor 2023.

“Normat neto të shfrytëzimit, të dhomave dhe të shtretërve, janë dy tregues të cilët masin përqindjen e shfrytëzimit të kapaciteteve akomoduese, dhoma e shtretër të disponueshëm për vizitorë.

Gjatë këtij muaji, norma e shfrytëzimit të dhomave të “Hoteleve dhe akomodimeve të ngjashme” është 12,7%, kundrejt 9,7% që ishte në muajin Nëntor 2022.

Norma e shfrytëzimit të shtretërve të “Hoteleve dhe akomodimeve të ngjashme” është 16,2%, kundrejt 9,1% që ishte në Nëntor 2022” thuhet në njoftim./Burimi: Monitor https://www.monitor.al/hotelet-me-rritje-edhe-ne-nentor-60-7-me-shume-te-huaj-shtohen-net-qendrimet/

Më të lexuarat