Depozitat ne valute bien ndjeshem ne shkurt, dobet edhe kursimet ne leke
Muaji shkurt nuk ka qenë i mbarë për kursimet e depozituara në sistemin bankar, si në monedhën vendase ashtu dhe atë në valutë.
Ecuria negative është orientuar më shumë nga rënia e depozitave të bizneseve, por edhe individët nuk kanë arritur të shtojnë paratë e hequra mënjanë.
Sipas statistikave të Bankës së Shqipërisë, në shkurt, stoku i depozitave në euro arriti në 7.27 miliardë euro, me një rënie prej 1.7% në krahasim me muajin e mëparshëm, ose 128 milionë euro më pak.
Kjo është tkurrja më e fortë e kursimeve në monedhën e përbashkët, të paktën që nga viti 2016, kur Banka e Shqipërisë i raporton të dhënat e detajuara në valutë.
Tendenca është krejt e kundërt në krahasim me muajt e mëparshëm, kur shtesa mujore ishte relativisht e lartë (shiko grafikun: Ndryshimi mujor i depozitave në euro (mln euro), janar 2016-shkurt 2024).
Tkurrja në shkurt erdhi nga rënia e depozitave të bizneseve (Korporata jofinanciare private), që u reduktuar me 157 milionë euro, ose 12.5% më pak.
Megjithatë, edhe individët nuk kanë arritur të rrisin depozitat pa afat, ndërsa ato me afat janë zgjeruar me ritme shumë më të ngadalta në krahasim me muajt e mëparshëm.
Për shkak të ecurisë së mirë deri në fund të 2023-s, depozitat në valutë janë rritur me 13.6% me bazë vjetore (shkurt 2024/shkurt 2023), ose 871 milionë euro më shumë.
Bien dhe kursimet në lekë
Edhe depozitat në valutë kanë shfaqur shenja ngadalësimi. Stoku i kursimeve në monedhën vendase ishte rreth 592 miliardë lekë, me një tkurrje prej 0.25% (1.5 miliardë lekë më pak) në krahasim me muajin e mëparshëm.
Ashtu si me valutën, ndikimin e ka dhënë rënia e kursimeve të bizneseve, që u tkurrën me 6%, ose 6.4 miliardë lekë më pak. Muajt e mëparshëm kursimet e bizneseve kishin njohur një rritje të fortë.
Edhe depozitat e individëve në lekë nuk dhanë shenja rritjeje, pavarësisht se cikli i interesave është në rritje. Kthimet më të favorshme në letrat me vlerë të qeverisë duket se po i orientojnë individët drejt tregut të bonove e obligacioneve.
Me bazë vjetore (shkurt 2024/shkurt 2023), kursimet në lekë janë rritur me 7.4%, ose 41 miliardë lekë më shumë.
Të raportuara në lekë, stoku total i kursimeve në vend arriti në 1.3 trilionë lekë në shkurt, me një tkurrje prej 0.4% në krahasim me muajin e mëparshëm. 45% e kursimeve janë në monedhën vendase dhe 55% në valutë, kryesisht euro.
Ecuria negative është orientuar më shumë nga rënia e depozitave të bizneseve, por edhe individët nuk kanë arritur të shtojnë paratë e hequra mënjanë.
