98 mln euro kredi nga BERZH per hekurudhen Vore-Hani i Hotit, linja do jete elektrike
Komisioni për Çështjet Evropiane ka miratuar projektligjin për ratifikimin e marrëveshjes së huasë me BERZH në vlerën prej 98 750 000 euro për rehabilitimin e hekurudhës Vorë-Hani i Hotit.
Punimet për këtë projekt parashikohet të zgjasin plot 6 vite, dhe faza e parë e punës do të nisë në fund të këtij viti, për të përfunduar së ndërtuari në vitin 2030.
Hekurudha e re do të jetë e elektrifikuar ndërsa shpejtësia e lëvizjes së trenave do të jetë deri në 120 kilometra në orë, ndërsa koha mesatare e udhëtimit nga Vora në Hanin e Hotit do jetë 2 orë.
Ndërsa kostoja totale e këtij projekti është 373 milionë euro, një pjesë e së cilës do të mbulohet edhe nga buxheti i shtetit, pjesa tjetër nga BERZH, BE përmes Kornizës së Investimeve të Ballkanit Perëndimor dhe Banka Evropiane e Investimeve.
Në komision Zëvendësministrja e Infrastrukturës Enkeleda Muçaj ka bërë edhe një prezantim të projekteve të tjera hekurudhore për të cilat po punohet.
"Po punohet edhe për Durrës-Rrogozhinë, dhe për Rrogozhinë-Qafë Thanë dhe këtu kemi marrë mbështetje nga WBEF, dhe presim studimin e fizibilitetit për të parë sa do të jetë vlera e investimit.
Po mbyllet edhe studimi me Maqedoninë e Veriut. Porti i Durrësit, lidhet me Rrogozhinën, Qafë-Thanën, pastaj Bullgarinë për të shkuar në detin e Zi. Po bëjmë edhe studimin e fizibilitetit për hekurudhën Durrës-Prishtinë”, tha Zëvendësministrja.
Po ashtu përfaqësuesit e ministrisë bënë të ditur që në mars të vitit 2025, përfundon hekurudha Tiranë-Durrës./Burimi: Shqiptarja.com
Punimet për këtë projekt parashikohet të zgjasin plot 6 vite, dhe faza e parë e punës do të nisë në fund të këtij viti, për të përfunduar së ndërtuari në vitin 2030.
