Infrastruktura e celesave publike, tender rreth 5 mln euro per permiresimin
Infrastruktura e çelësave publikë që ka në thelb sigurinë për shërbimet elektronike në vend do t’i nënshtrohet përmirësimit.
Agjencia Kombëtare e Shoqërisë së Informacionit njoftoi këtë të martë një procedurë prokurimi që ka në thelb këtë objektiv me një fond limit 499 milionë lekë apo rreth 5 milionë euro.
Në dokumentet që shoqërojnë procedurën sqarohet dhe qëllimi i kësaj ndërhyrje që parashikohet duke e përmbledhur në pesë pika.
Qëllimet e këtij projekti janë si më poshtë:
Përmirësimi i Performancës: Përmirësimi i hardware dhe software ekzistues për të rritur performancën dhe efikasitetin e infrastrukturës PKI, duke siguruar që ajo të përballojë me sukses sasinë e rritur të trafikut dhe të dhënave të procesuara.
Përmirësimi i Sigurisë: Përmirësimi i sistemit PKI për të adresuar të gjithë aspektet e sigurisë, duke përfshirë përditësimin e algoritmeve të enkriptimit, monitorimin e rreziqeve të sigurisë, dhe zbatimin e politikave të sigurisë më të rrepta për të mbrojtur infrastrukturën nga kërcënime të jashtme dhe të brendshme.
Përshkallëzimi dhe Fleksibiliteti: Përmirësimi i infrastrukturës PKI për të lejuar rritjen e lehtë të kapacitetit sipas nevojës, përmes përdorimit të teknologjive të virtualizimit dhe përshkallëzimit të burimeve për t’u përshtatur sipas nevojave.
Standardizimi dhe Kompatibiliteti: Sigurimi që infrastruktura PKI është e bazuar në standarde të njohura dhe është e kompatibël me aplikacionet dhe pajisjet e përdorura. Kjo do të sigurojë që të dhënat dhe certifikatat mund të vazhdojnë të përdoren në të njëjtën mënyrë si më parë.
Monitorimi dhe Menaxhimi i Performancës: Implementimi i një sistemi të monitorimit dhe menaxhimit të performancës për të identifikuar dhe trajtuar problemet ose bllokimet e mundshme në kohë reale dhe për të siguruar që infrastruktura PKI funksionon pa ndërprerje.
Infrastruktura e çelësave publikë është e lidhur direkt me vulat elektronike ku sipas të dhënave në portalin e-albania ofrohen 89 dokumente me vulë elektronike, një pjesë prej së cilave ofrohen vetëm elektronikisht, duke eliminuar tërësisht printimin e tyre në letër në sportelet fizike të institucioneve.
Për periudhën Shtator 2017 – Dhjetor 2023, janë gjeneruar mbi 30 milionë dokumente me vulë elektronike. Përdoruesit e shërbimeve elektronike janë institucionet publike, bizneset dhe individët.
Agjencia Kombëtare e Shoqërisë së Informacionit njoftoi këtë të martë një procedurë prokurimi që ka në thelb këtë objektiv me një fond limit 499 milionë lekë apo rreth 5 milionë euro.
