71 per qind e bizneseve kane pohuar se do rrisin pagat ne vitin ne vijim
Bizneset shqiptare janë duke i vlerësuar pagat si një mjet për të mbajtur fuqinë punëtore që është shndërruar në një problem kryesor për mbarëvajtjen e aktivitetit të tyre.
Sipas anketës së Barometrit të Ballkanit 2024 që u zhvillua nga Këshilli i Bashkëpunimit Rajonal, 71% e sipërmarrjeve shqiptare kanë deklaruar se kanë në plan të rrisin pagat për punonjësit në 12 muajit në vijim, që nënkupton periudhën ndërmjet prill 2024-prill 2025.
Siç shihet nga tabela e mëposhtme 15% e bizneseve shqiptare ishin të sigurta për rritjen e pagave, ky tregues në Bosnjë ishte 20%, në Kosovë dhe në Maqedoninë e Veriut me nga 19% secila, ndërsa në Mal të Zi, 5% dhe Serbi 6%.
Një përqindje më e madhe biznesesh shqiptare rreth 56 %, pohuan se me shumë mundësi do të aplikonin rritje të pagave për punonjësit ndërmjet prillit 2024 dhe prillit 2025. Kjo ishte përqindja më e lartë në rajon, e ndjekur nga Kosova dhe nga Bosnja.
Rezultatet e sondazhit të vitit 2024 tregojnë se bizneset, që operojnë në ekonomitë e Ballkanit Perëndimor, shikojnë si pengesa më të përhapura për të bërë biznes ato që lidhen me disponueshmërinë e punëtorëve.
Grupi i dytë i pengesave janë doganat, normat e taksave dhe rregulloret tregtare, paqëndrueshmëria politike ose sociale, aksesi në financa, kërkesa e dobët, ekonomia informale dhe konkurrenca e pandershme.
Diskriminimi në bazë të përkatësisë etnike, gjinisë, moshës dhe të ngjashme është identifikuar si pengesa më e vogël në të gjitha ekonomitë e Ballkanit Perëndimor siç ishte edhe vitin e kaluar.
Faktorët më të rëndësishëm për zhvillimin e marrëdhënieve të biznesit me ekonomitë e Ballkanit Perëndimor janë çmimet (88%), taksat (87%) dhe fuqia punëtore (86%).
Kjo nënvizon rëndësinë e frenimit të presioneve inflacioniste dhe të një sistemi të favorshëm tatimor; duke ulur kështu barrën financiare për bizneset, duke i lejuar ata të investojnë më shumë në rritje dhe inovacion.
Për më tepër, Barometri thekson nevojën kritike për fuqi punëtore të kualifikuar dhe të përballueshme për të mbështetur operacionet e biznesit dhe rritjen në të gjithë rajonin.
Edhe kostot e transportit dhe heqja e barrierave tregtare mbeten gjithashtu shqetësime të larta./Burimi: Monitor https://monitor.al/71-e-bizneseve-kane-pohuar-se-do-te-rrisin-pagat-ne-vitin-ne-vijim/
Sipas anketës së Barometrit të Ballkanit 2024 që u zhvillua nga Këshilli i Bashkëpunimit Rajonal, 71% e sipërmarrjeve shqiptare kanë deklaruar se kanë në plan të rrisin pagat për punonjësit në 12 muajit në vijim, që nënkupton periudhën ndërmjet prill 2024-prill 2025.
