Emigracioni drejt vendeve të pasura arrin nivel rekord në vitin 2023

Rritja e emigracionit ka ndihmuar ekonomitë të rimëkëmben nga kriza inflacioniste, por gjithashtu ka nxitur reagimin e votuesve

Emigracioni i ligjshëm në disa nga vendet më të pasura të botës arriti një maksimum historik në vitin 2023, duke shkaktuar një reagim të ashpër të votuesve kundër qeverive, pavarësisht prirjes që nxit rritjen dhe krijimin e vendeve të punës.

Rreth 6.5 milionë njerëz u zhvendosën në 38 vendet anëtare të Organizatës për Bashkëpunim dhe Zhvillim Ekonomik (OECD) përmes rrugëve të përhershme të emigracionit vitin e kaluar. 

Kjo ishte një rritje pothuajse 10 % në krahasim me nivelin rekord të mëparshëm prej 6 milionë banorësh që u zhvendosën në vitin 2022, tregoi një raport nga organizata me bazë në Paris.

Rritja më e madhe ishte në Mbretërinë e Bashkuar, e cila për herë të parë u bë marrësi më i madh i emigrantëve pas SHBA-së, me emigracion neto prej 750,000 të nxitur nga rekrutimi në sektorin e kujdesit.

“Ky nuk është vetëm një rikuperim nga pandemia. Sigurisht që në vitin 2023 është një tjetër histori me të cilën po përballemi”, tha Jean-Christophe Dumont, kreu i divizionit të emigracionit ndërkombëtar të OECD-së, 

i cili vuri në dukje se trendi pasqyronte kërkesën e fortë për punëtorë të huaj dhe studime jashtë shtetit.

Rreth një e treta e vendeve të OECD-së kishin nivele rekord emigracioni në vitin 2023, duke përfshirë Kanadanë, Francën dhe Japoninë. SHBA pranoi 1.2 milionë emigrantë të përhershëm të ligjshëm.

Ekonomistët besojnë se rritja e lëvizjes ndërkufitare i ka ndihmuar ekonomitë e pasura të rimëkëmben nga kriza inflacioniste, që ndodhi si pasojë e pandemisë dhe pushtimit rus të Ukrainës.

Por shumë votues shqetësohen në shkallën në rritje të emigracionit dhe në azilkërkuesit që vijnë me rrugë të parregullta – edhe pse këto janë një pjesë e vogël e shifrave të përgjithshme. 

Të gjitha qeveritë aktuale të OECD-së që u përballën me votimet për t’u rizgjedhur këtë vit, humbën pjesën e tyre të votave, me shumë prej tyre humbën postin, përfshirë SHBA-në.

Presidenti i sapozgjedhur Donald Trump e bazoi fushatën e tij në premtimet për të goditur emigracionin e parregullt në SHBA dhe potencialisht për të dëbuar miliona emigrantë që jetojnë në vend pa autorizim.

Numri i azilkërkuesve të rinj në vendet e OECD u rrit 30 % në një rekord prej 2.7 milionë, i nxitur nga një rritje e numrit të njerëzve që mbërrijnë në SHBA nga Venezuela, Kolumbia, Nikaragua dhe Haiti.

SHBA mori më shumë se një milion aplikime për azil – më shumë se totali për kërkesat për azil në të gjithë vendet europiane anëtare të OECD-së së bashku.

Analiza e publikuar këtë javë nga Goldman Sachs tregoi se emigracioni përbën pothuajse të gjitha fitimet e punësimit në Kanada, Zelandën e Re, Norvegji, Suedi, Gjermani dhe MB që nga fillimi i vitit 2023 – si dhe rritja e fuqisë punëtore në SHBA me më shumë se 4 milionë.

Vende të tjera që tradicionalisht kanë qenë ndër përfituesit më të mëdhenj të emigrantëve të rinj kanë ashpërsuar rregullat e tyre të hyrjes.

Kanadaja, Australia dhe Britania e Madhe kanë marrë masa për të kufizuar emigracionin e lidhur me punën, me Kanadanë që ka kufizuar numrin e banorëve të përkohshëm për herë të parë.

Të tre vendet po rimendojnë gjithashtu qasjen e tyre ndaj studentëve ndërkombëtarë, numri në rritje i të cilëve shihet si një burim presioni mbi tregjet e banesave.

Mbërritjet e studentëve ndërkombëtarë, të nxitur vitet e fundit nga shfaqja e një klase të mesme globale në gjendje të paguajnë për fëmijët e tyre për të studiuar jashtë vendit, u rritën me 6.7 % në të gjithë vendet e OECD në 2023 në 2.1 milion.

Mbretëria e Bashkuar tani ndalon studentët master që të sjellin anëtarë të familjes; ndërsa Australia dhe Kanadaja kanë rritur tarifat dhe kanë kufizuar numrin e studentëve. 

Holanda po ndërmerr hapa të ngjashëm, me rregulla të reja që kufizojnë numrin e lëndëve që mësohen në anglisht.

/Monitor (https://monitor.al/emigracioni-drejt-vendeve-te-pasura-arrin-nivel-rekord-ne-vitin-2023/)

Më të lexuarat