Kompania e naftës e Azerbajxhanit në Shqipëri, interes për gazin e Korçës

Kompania Shtetërore e Naftës e Republikës së Azerbajxhanit (SOCAR), njoftoi se po zgjeron praninë e saj ndërkombëtare me një blerje në arenën energjetike të Mesdheut Lindor.

Kompania Shtetërore e Naftës e Republikës së Azerbajxhanit (SOCAR), nja nga aksionerët e gazsjellësit TAP,  njoftoi se po zgjeron praninë e saj ndërkombëtare me një blerje në arenën energjetike të Mesdheut Lindor.

Më 31 janar 2025, SOCAR nënshkroi një marrëveshje me Union Energy për të blerë 10% të aksioneve efektive në fushën e gazit Tamar  një nga asetet më të rëndësishme energjetike të rajonit  që ndodhet në det të hapur të Izraelit.

Kjo blerje shënon një hap të rëndësishëm në ambicien e gjatë të SOCAR-it për të diversifikuar portofolin e saj global të energjisë.

“Kjo marrëveshje është një komponent kyç i shtytjes sonë strategjike për të shtrirë gjurmën tonë të prodhimit përtej Azerbajxhanit,” shpjegoi eksperti i energjisë Zafar Valiyev. 

“Fushat e naftës dhe gazit në Mesdheun Lindor, veçanërisht që nga viti 2010, janë shndërruar në rajone shumë fitimprurëse, duke tërhequr interes dhe investime të konsiderueshme ndërkombëtare.”

E zbuluar pas vitit 2009, fusha e gazit Tamar tani qëndron si një aset i rëndësishëm në rajon, me rezerva të provuara gazi prej rreth 300 miliardë metra kub dhe rezerva të rikuperueshme të vlerësuara në 238 miliardë metra kub. 

Aktualisht, duke prodhuar afërsisht 28 milionë metra kub në ditë, që përkthehet në një prodhim vjetor që tejkalon 10 miliardë metra kub, Tamar luan një rol qendror në tregun rajonal të energjisë. 

Një pjesë e konsiderueshme e prodhimit të saj është e rezervuar për konsumin e brendshëm të Izraelit, ndërsa pjesa tjetër eksportohet me kontrata afatgjata në vendet fqinje si Egjipti dhe Jordania.

Blerja e Tamar është një moment i rëndësishëm për SOCAR, duke shënuar hyrjen e saj të parë në fushat e gazit jashtë tregut të saj vendas. Ky veprim vjen mes rritjes së çmimeve të gazit natyror në Evropë, ku 1000 metra kub tani tregtohen me rreth 5550 dollarë një trend që pritet të vazhdojë. 

“Investimet në sektorin e gazit do të sjellin të ardhura të konsiderueshme dhe hyrja e SOCAR në tregun e Mesdheut Lindor mund të forcojë ndjeshëm nivelet e saj të të ardhurave”, shtoi Valiyev.

Që nga viti 2005, SOCAR ka zgjeruar vazhdimisht operacionet e saj ndërkombëtare, duke investuar në tregje përtej Gjeorgjisë, Rumanisë, Ukrainës, Turqisë, Austrisë dhe Zvicrës. 

Sipërmarrjet e saj jashtë Azerbajxhanit kanë shtrirë kryesisht sektorët e shitjes me pakicë dhe shumicë të produkteve të naftës, të plotësuar nga objektet strategjike të prodhimit në Turqi, të tilla si Rafineria e Naftës Star dhe më parë Petkim. 

Këto investime kanë qenë vendimtare për të mbështetur jo vetëm sigurinë energjetike të Turqisë, por edhe kërkesën në rritje për produkte kimike.

Lëvizja e fundit e SOCAR-it nënvizon angazhimin e saj për të luajtur një rol gjithnjë e më me ndikim në tregun botëror të energjisë, duke krijuar terrenin për investime të mëtejshme strategjike në asetet kryesore ndërkombëtare, sipas njoftimit zyrtar.

Interes për gazin në Korçë

Duke iu referuar Ambasadës së Azerbajxhanit në Shqipëri, SOCAR gjithashtu planifikon të hapë një zyrë në Tiranë së shpejti për të eksploruar më tej mundësitë e fushave të përfitimit reciprok të bashkëpunimit dypalësh dhe mundësive për investime. 

Që nga viti i kaluar, SOCAR ka qenë në bisedime me homologët shqiptarë për të plotësuar sfondin ligjor të projektit të gazifikimit të qytetit të Korçës. Pas përfundimit të fazës ligjore të projektit, palët mund të vazhdojnë me zbatimin e tij, përfundon njoftimi për shtyp.

Në planet e shfrytëzimit të gazit një nga projektet e qeverisë është ai për gazifikimin që do të nisë nga qyteti i Korçës. Ky projekt është i përfshirë në planin e investimeve 10 vjeçare të kompanisë shtetërore Albgaz dhe parashikon instalimin e infrastrukturës së nevojshme në qytet për shfrytëzimin e gazit nga familjet dhe biznesi. 

Në një fazë tjetër kjo parashikohet të shtrihet në qytete të tjera si Pogradeci, Fieri apo Elbasani. Në nëntor të 2024-ës qeveria shqiptare nënshkroi një memorandum me kompaninë shtetërore të naftës në Azerbajxhan SOCAR që në thelb zhvillimin e infrastrukturës së gazifikimit në qytetin e Korçës (shënim i Monitor).

Socar është një prej aksionerëve të gazsjellësit TAP, me 20% të aksioneve, së bashku me BP (20%), Snam (20%), Fluxys (20%) dhe Enagás (20%).

Gazsjellësi Trans Adriatik operon një infrastrukturë transporti të gazit natyror nga kufiri grek me Turqinë në Italinë Jugore, duke u mundësuar palëve të interesuara të tregtojnë gaz në disa vende evropiane, ndër të cilat dhe në Shqipëri./Monitor (https://monitor.al/kompania-e-naftes-socar-e-azerbajxhanit-do-hape-zyre-dhe-ne-shqiperi-interes-per-gazin-e-korces/)

Më të lexuarat