Në prag sezoni turistik, por aktiviteti sizmik boshatis destinacionet më të populluara në Greqi
Aktiviteti sizmik në Detin Egje ka boshatisur rrugët e destinacioneve turistike më të njohura të Greqisë.
Aktiviteti sizmik në Detin Egje ka boshatisur rrugët e destinacioneve turistike më të njohura të Greqisë, pasi shqetësimet për një tërmet të madh të mundshëm vazhdojnë të rriten midis vendasve.
Ishulli Amorgos i njohur për ujërat e tij të kristalta dhe si lokacion i xhirimeve të filmit ‘The Big Blue’ të regjisorit Luc Besson, si dhe Santorini si një nga pikat turistike më të vizituara të vendit janë ndër ishujt e prekur nga pasiguria si pasojë e aktivitetit sizmik.
Sipas Institutit të Sizmologjisë të Greqisë, në Detin Egje gjatë javëve të fundit janë regjistruar më shumë se 12 mijë tërmete, me disa prej tyre që kalojnë magnitudën 5.
Në ishullin Amorgos dhe në tre ishuj të tjerë është shpallur gjendje e jashtëzakonshme deri më 11 mars, pasi sizmologët vazhdojnë të monitorojnë zonën për rreziqe të mundshme.
Një nga fatkeqësitë më shkatërruese në historinë e ishullit Amorgos ishte tërmeti me magnitudë 7,7 në vitin 1956.
Ky tërmet, që shkaktoi valë deri në 30 metra të larta, mori jetën e 53 personave dhe plagosi 529 të tjerë. Tërmeti gjithashtu la një shkatërrim të gjerë përgjatë bregdetit dhe një ndikim të qëndrueshëm në rajon.
Masat e autoriteteve për sigurinë në Santorini
Ministrja greke e Turizmit, Olga Kefalogianni, konfirmoi nga panairi ndërkombëtar i turizmit ITB në Berlin se Greqia është e gatshme të mirëpresë vizitorët këtë vit, duke marrë masa të veçanta sigurie.
“Që në minutën e parë, ne thamë se prioriteti kryesor është siguria e banorëve dhe vizitorëve. Pra, po hapim Santorinin dhe presim një sezon sa më normal,” tha Kefalogianni.
Ajo shtoi se qeveria po merr të gjitha masat e nevojshme për të siguruar qëndrueshmërinë e infrastrukturës dhe mbrojtjen e vizitorëve, duke përfshirë masa kundër rënies së shkëmbinjve dhe përmirësimin e sistemeve mbrojtëse në shpatet e ishullit.
Kthimi i turistëve dhe optimizmi për sezonin veror
Kryebashkiaku i Santorinit, Nikos Zorzos, tha se mijëra njerëz janë kthyer në ishull dhe bëri thirrje për ndihmë nga qeveria në menaxhimin e rrezikut. Ai nënvizoi nevojën për parandalimin e rrëshqitjeve të dheut dhe riparimin e gardheve mbrojtëse në zonat e rrezikuara.
Megjithë sfidat, autoritetet mbeten optimiste për sezonin turistik, i cili nis në prill.
“Presim që turistët të vijnë jo vetëm në Santorini, por edhe në të gjitha destinacionet e bukura që Greqia ofron,” tha Kefalogianni.
Në mbështetje të rimëkëmbjes ekonomike, Greqia ka miratuar tre iniciativa të rëndësishme turistike me një vlerë prej mbi 1.2 miliardë euro, që synojnë fuqizimin e sektorit dhe nxitjen e rritjes ekonomike pas krizës sizmike. /Ora News
