Zgjerimi i Kaskadës së Devollit, studimi i fizibilitetit, detajet e projektit
Shoqëria “Devoll Hydropower” ka përfunduar studimin e fizibilitetit për një ujëmbledhës me stacion pompimi në lumin Devoll, për rritjen e kapaciteteve energjetike.
Shoqëria “Devolli Hydropower” ka përfunduar studimin e fizibilitetit për ndërtimin e një ujëmbledhësi me stacion pompimi në pjesën e sipërme të lumit Devoll, që synon të rrisë kapacitetet rezervuese dhe balancuese të energjisë.
Përfaqësuesit e kompanisë bënë publike pak ditë më parë detajet e projektit, që sipas tyre do të jetë me rezervuar të vogël, me kapacitet 25 mln m3.
Për të kuptuar madhësinë e rezervuarit u soll në vëmendje ai i Moglicës, që ka një kapacitet ujëmbledhës prej 280 mln m3 ujë. Ndërkaq, projekti parashikon që e gjithë infrastruktura, së bashku me agregaët do të jetë e pozicionuar nën shkëmb.
Sipas përfaqësuesve të kompanisë studimi arrin në konkluzionin se projekti është rajonal, çka do të thotë se nuk synon vetëm nevojat e rezervës apo balancimit që do të ketë nevojë Shqipëria, por do të përmbushë nevojat që do të ketë Evropa Juglindore apo kontitenti evropian.
Po ashtu, gjatë prezantimit u bë me dije se kosto e projektit është 1.7 mld lekë.
Studimi i fizibilitetit erdhi pas shtesë së katërt e kontratës koncesionare për optimizimin e shfrytëzimit hidrologjik të lumit Devoll dhe hidrocentraleve që tashmë janë ndërtuar, që u miratua nga Kuvendi në vitin 2023.
Gjithsesi, në rast të finalizimit të projektit, në dokument nuk është përfshirë asnjë parashikim mbi përfitime që do i vijnë portofolit energjetik të Shqipërisë.
Kaskada e Devollit përbehet nga hidroecentralet e Banjës dhe Moglicës, që janë në prodhim. Kontrata fillesatre për ndërtimin e tyre u firmos në vitin 2008, ndërkohë që gjatë kësaj periudhe ka pësuar 3 shtesa në vitet 2010, 2013 dhe 2015./Scantv
