Votat e Diasporës: 21 mijë zarfe ende të pa shpërndarë, Greqia mbetet problematike
Në total, 21 mijë votues nga e gjithë diaspora nuk kanë marrë zarfet me fletët e votimit.
Edhe këtë të martë asnjë zarf me votat e emigrantëve nuk ka mbërritur në Shqipëri. Një ditë më parë, kompania postare DHL u arsyetua me faktin se ishin mbledhur pak vota për të nisur avionin.
Në total, 21 mijë votues nga e gjithë diaspora nuk kanë marrë zarfet me fletët e votimit, 11 mijë prej të cilëve për shkak se nuk kanë shënuar adresat e sakta. 80 mijë votues e kanë marrë zarfin, por s’i kanë kthyer.
Në Greqi janë raportuar edhe problematikat më të mëdha. Në total, deri më tani kanë mbërritur 144 783 zarfe në KQZ. Nga Greqia vetëm 23 640 zarfe kanë mbërritur nga 68 380 të dërguara në total.
Emigrantët që jetojnë në ishuj sot kanë afatin e fundit për të dorëzuar zarfet, ndërsa shqiptarët që jetojnë në zonat e tjera të Greqisë, duhet të kontaktojnë postën dhe të takohen me të, maksimalisht deri të premten e 9 majit. Udhëzimi tani është që çdo emigrant të shkojë vetë tek zyra postare, të gjejë zarfin e tij, të votojë e ta dorëzojë.
Thirrje të vazhdueshme ndaj emigrantëve që jetojnë në Greqi ka bërë edhe kryeministri Edi Rama, teksa është shprehur se nuk duhet që ta humbasin këtë moment historik, atë të votimit për herë të parë nga jashtë. Edhe mëngjesin e sotëm, në “Sy m’sy”, Rama apeloi emigrantët që të mos e humbin mundësinë për të votuar.
