Bashkëpronësia në ndërtesa, tarifat dhe penalitetet sipas ligjit të ri

Ligji i ri për bashkëpronësinë në ndërtesat kolektive sjell rregulla më të qarta dhe detyrime më të forta për administrimin e hapësirave të përbashkëta.

Ligji i ri për bashkëpronësinë në ndërtesat kolektive parashikon rregulla më të qarta dhe detyrime më të forta për administrimin dhe mirëmbajtjen e hapësirave të përbashkëta, përfshirë tarifat dhe ndëshkimin për mospagimin e tyre.

Sipas aktit ligjor, brenda muajit janar të çdo viti, asambleja e bashkëpronarëve duhet të miratojë paketën e administrimit, e cila përmbledh të gjitha shërbimet e domosdoshme si pastrimi, higjienizimi i shkallëve, mirëmbajtja e rrugëve të brendshme, lulishteve, parqeve, ashensorëve dhe standardet e përgjithshme të administrimit. Këto shërbime përcaktohen me çmime përkatëse dhe bëhen pjesë e buxhetit vjetor të ndërtesës.

Tarifa e administrimit, penalizimet për mospagimin e saj

Sipas nenit 32, tarifa e administrimit është e njëjtë për të gjithë bashkëpronarët dhe përcaktohet bazuar në shpenzimet e administrimit dhe në kuotën e pjesëmarrjes në bashkëpronësi të pronarëve të njësive.

Përjashtimisht, për pronarët e njësive, të cilët i shfrytëzojnë vetë apo përmes të tretëve këto njësi për qëllime tregtare, tarifa që aplikohet duhet të jetë më e lartë se ajo që aplikohet për pronarët e njësive familjare, duke marrë parasysh qëllimin e përdorimit të njësisë, amortizimin e pronës së përbashkët, ashensorëve, shpenzimet për pastrimin dhe mirëmbajtjen e hapësirave të përbashkëta dhe frekuentueshmërinë e saj.

Në mungesë dakordësie nga asambleja, zbatohet tarifa e referencës, e miratuar nga këshilli bashkiak, e ndarë sipas zonave dhe tipologjisë së ndërtesës. Është ministri vendor ai që miraton udhëzuesin për parimet dhe llogaritjen e tarifës.

Penalitetet për mospagimin e tarifës së administrimit

Ligji parashikon gjithashtu se nëse tarifa nuk paguhet në kohën e caktuar, për çdo muaj vonesë aplikohet një kamatë prej 30% të shumës mujore. Kamata nuk zbatohet për pronarët që gëzojnë status dhe mbrojtje të veçantë ligjore, sipas legjislacionit në fuqi.

Nëse detyrimi nuk shlyhet brenda 3 muajve, administratori ose shoqëria e administrimit njofton me shkrim kryesinë dhe asamblenë, dhe afishon në ndërtesë emrat e debitorëve bashkë me shumën e detyruar. Kryesia më pas verifikon dhe përcakton zyrtarisht detyrimin financiar.

Vendimi i kryesisë për detyrimet e papaguara përbën titull ekzekutiv, çka nënkupton se mund të ekzekutohet nga përmbarimi gjyqësor në bazë të Kodit të Procedurës Civile.

Barra hipotekore

Gjithashtu administratori ka të drejtë që, pas 12 muajsh mospagese ose kur borxhi kalon 0.5% të vlerës së njësisë, të kërkojë vendosjen e një kufizimi ligjor në Kadastrën Shtetërore mbi pasurinë e bashkëpronarëve debitorë.

Kjo nënkupton që prona nuk mund të shitet, të jepet me qira apo të ngarkohet me barrë deri në shlyerjen e plotë të detyrimeve.

Kufizimi hiqet me kërkesë të pronarit të njësisë  kur vërtetohet shlyerja e detyrimeve të akumuluara me anë të vërtetimit bankar, pa qenë e nevojshme nxjerrja e vendimit të kryesisë. Agjencia Shtetërore e Kadastrës heq kufizimin në kartelë brenda 5 ditësh nga data e depozitimit të vërtetimit të shlyerjes së detyrimit nga pronari i njësisë./ekofin.al

Më të lexuarat