Rruga Elbasan-Qafë Thanë, 378 mln lekë për shpronësimet, pjesë e korridorit VIII
Rreth 378 mln lekë është fondi i shpronësimeve për pronarët që preken nga ndërtimi i aksit rrugor Elbasan– Qafë Thanë, pjesë e korridorit VIII.
Lista me pasuritë që do të kompensohen për lotin 4 është publikuar në Fletoren Zyrtare, ndërsa specifikohet se afati i përfundimit të shpronësimit është brenda 3 muajve. Ndërkaq, për të përfituar pronarët që janë pjesë e listës, duhet të paraqesin dokumentacionin justifikues për likujdim pranë Agjencisë Shtetërore për Shpronësimin.
Me përmbylljen e procesit të shpronësimit të pronarëve i hapet rruga përfundimit të punimeve në këtë segment rrugor, ku aktualisht është duke u punuar në disa faza.
Më konkretisht në drejtimin nga Elbasani në Qafë – Thanë punohet në 8 lote me një gjatësi prej 26 km, teksa ecuria e secilit prej tyre është e ndryshme. Më e avancuar është faza e parë, që është hapur për qarkullimin e automjeteve, teksa deri pak muaj më parë ecuria në lotet 2- 5 varionte nga 36%, në 70%.
Pjesë e korridorit VIII është edhe bypassi-i i Elbasanit, ku punimet nuk kanë nisur ende, ndërkohë që janë edhe 6 lote të tjerë në drejtimin nga Elbasani në Rrogozhinë, ku aktualisht punohet. Këto lote nisin pranë ish-Kombinatit Metalurgjik të Elbasanit në drejtim të Lekajt, ku bëhet bashkimi me autostradën Adriatiko – Joniane.
Korridorit 8 do të lidhë portet e Italisë, me portet e Varnës dhe Burgasit në Bullgari duke kaluar përmes Shqipërisë, Maqedonisë së Veriut dhe Bullgarisë. Në territorin shqiptar ai shtrihet në rreth 154 km. /Scantv
