AMF forcon kriteret e deklarimit për aksionarët dhe përfituesit fundorë të institucioneve financiare

Në fund të korrikut, Bordi i AMF miratoi ndryshime rregullatore që prekin dokumentacionin për aksionarët dhe burimet e kapitalit të subjekteve që mbikëqyr.

Bordi i Autoritetit të Mbikëqyrjes Financiare (AMF) miratoi në fund të muajit korrik disa ndryshime në kuadrin rregullator që lidhet me dokumentacionin e kërkuar në lidhje me aksionarët dhe burimet e kapitalit të subjekteve të mbikëqyrura.

Në tërësi, ndryshimet rregullatore tentojnë të forcojnë kërkesat e lidhura me parandalimin e pastrimit të parave dhe financimit të terrorizmit. Ndryshime të ngjashme në kuadrin rregullator ka miratuar në vitet e fundit edhe Banka e Shqipërisë.

Në rregulloren “Për procedurat dhe mënyrën e depozitimit të informacionit dhe dokumentacionit në lidhje me burimin e kapitalit për aksionarët e shoqërisë së sigurimit” është vendosur përcaktimi se çdo vit, brenda muajit janar, shoqëria e sigurimit duhet të depozitojë në AMF çdo ndryshim të aksionarit të fundit përfitues, pavarësisht kuotave që zotëron në shoqëri. Me rregulloren e mëparshme, ky detyrim ekzistonte vetëm për aksionarët që zotëronin të paktën 10% të aksioneve.

Gjithashtu, në dokumentacionin e kërkuar për licencim, do të kërkohet struktura e kapitalit të aksionarit që është person juridik, deri në aksionarin e fundit përfitues. Në rregulloren e mëparshme, ky detyrim ekzistonte deri në aksionarin e fundit përfitues që zotëronte jo më pak se 10% në kapitalin e shoqërisë.

Ndërkohë, i gjithë dokumentacioni bazë i kërkuar për licencimin e një shoqërie sigurimi do të kërkohet jo vetëm për shoqërinë vetë, por edhe për aksionarin e saj person juridik, në rastet kur ky subjekt zotëron më shumë se 25% të aksioneve. Me rregulloren e mëparshme, ky dokumentacion kërkohej në rast të zotërimit të të paktën 30% të aksioneve.

Në rregullore është shtuar gjithashtu se shoqëritë e sigurimit kanë detyrimin të garantojnë përmbushjen e vazhdueshme të kritereve të përshtatshmërisë dhe integritetit nga individët që mbajnë pozicionet përkatëse.

Vlerësimi i këtyre kritereve duhet të kryhet rregullisht, të paktën një herë në vit, si dhe në çdo rast kur ndodhin ndryshime të rëndësishme në rrethanat që mund të ndikojnë në profilin e individit. Shoqëritë e sigurimit duhet të depozitojnë në AMF çdo vit, brenda muajit mars të vitit pasardhës vetëdeklarimet përkatëse të çdo individi mbi vijueshmërinë e përmbushjes së kritereve.

Rregullorja e re parashikon gjithashtu se AMF, gjatë vlerësimit të përmbushjes së kritereve të përshtatshmërisë dhe integritetit të aksionarëve, do të verifikojë listat e shpallura të sanksioneve të OKB-së dhe të BE-së, njoftimet e OKB-së, si dhe listat e Integruara të Personave të shpallur.

Ndryshime të ngjashme në rregullore janë miratuar edhe për subjektet e tjera financiare që licencohen dhe mbikëqyren nga AMF, si shoqëritë administruese të fondeve të pensionit privat, të sipërmarrjeve të investimeve kolektive, depozitarëve të tyre, bursave, etj. /Monitor(https://monitor.al/amf-forcon-kriteret-e-deklarimit-per-aksionaret-dhe-perfituesit-fundore-te-institucioneve-financiare/)

Më të lexuarat