92.7 mln euro për reformimin e mëtejshëm të Administratës Publike deri në vitin 2027

Është botuar në Fletore Zyrtare Strategjia e Administratës Publike 2025–2027, që përcakton objektivat, masat prioritare dhe burimet financiare.

Është botuar në Fletore Zyrtare, Strategjia e Administratës Publike për periudhën 2025–2027, e cila përcakton objektivat kryesore të reformës që pritet të vijojë, masat prioritare dhe burimet financiare të nevojshme për realizimin e tyre.

Me një kosto totale prej 9.27 miliardë lekësh, strategjia synon të përmirësojë menaxhimin e burimeve njerëzore, zhvillimin e politikave publike, digjitalizimin e shërbimeve dhe krijimin e një administrate të qëndrueshme e miqësore me mjedisin.

Megjithatë, zbatimi i strategjisë përballet me një hendek financiar prej 634.2 milion lekësh, që përfaqëson 6.84% të kostove totale, duke e bërë të domosdoshme një planifikim të kujdesshëm dhe një angazhim të vazhdueshëm institucional për sigurimin e fondeve të nevojshme.

Pavarësisht këtij hendeku, strategjia vlerësohet si e realizueshme, veçanërisht për qëllimin e tretë të politikës “Ofrimi i Shërbimeve dhe Digjitalizimi”, i cili nuk përballet me asnjë mungesë financimi.

Sa i përket përmirësimit të shpërblimit financiar, do të vijojë adresimi i elementeve të tjera të reformës së pagave. Krahas rritjes së pagave në vlerë tashmë të realizuar, do të ndryshohet edhe struktura e pagës përmes ndryshimit të ligjit nr. 152/2013 “Për nëpunësin civil”, duke integruar në shpërblimin financiar edhe kritereve motivuese të performancës në punë, përcakton dokumenti.

Përmirësimi i transparencës në shpërblimin financiar të nëpunësve publikë do të jetë një tjetër drejtim i rëndësishëm i masave drejt ndërtimit të një administrate të drejtë dhe të besueshme. Ndërhyrjet do të përfshijnë jo vetëm komunikimin e qartë dhe të detajuar të pagave dhe përfitimeve periodikisht për secilin punonjës, por edhe përfshirjen e informacionit të saktë mbi pagën e pritshme në njoftimet për aplikimet për vendet vakante.

Sipas Strategjisë, do të vijohet me konsolidimin e punës fleksibël që është në zbatim prej gushtit 2024, si një mekanizëm i rregullt dhe lehtësisht i aplikueshëm që synon balancën më të mirë mes jetës profesionale dhe asaj personale për nëpunësit publikë. Në po të njëjtin drejtim, do të vlerësohet edhe mundësia për të minimizuar orarin e punës për disa institucione/pozicione specifike, me qëllim tërheqjen e personave nga sektori privat që nuk mund të punësohen me kohë të plotë në administratë, si dhe të kategorive të tjera të personave që nuk mund të angazhohen sipas orarit standard.

Drejt Administratës së Gjelbër

Digjitalizimi i proceseve të brendshme të qeverisjes mund të zvogëlojë ndjeshëm konsumin e letrës, energjisë, dhe transportit që shoqëron procedurat administrative.

Për një sektor publik që redukton përdorimin e letrës fizike, vetiu lind detyra për t’iu përgjigjur më shpejt kërkesave të qytetarëve dhe biznesit, në mënyrë më efikase dhe duke shpenzuar më pak burime. Megjithatë, nga ana tjetër digjitalizimi mund të çojë në nevojën për më shumë pajisje teknologjike dhe konsum më të lartë të energjisë, dhe për rrjedhojë edhe rritje të emetimeve të gazeve me efekt serrë.

Për këtë arsye, duhet promovuar zgjerimi i përdorimit të energjisë së rinovueshme për të gjeneruar energji elektrike në sektorin TIK, dhe së dyti, përdorimin e zgjidhjeve digjitale të gjelbra më efikase për konsumimin e energjisë në institucionet publike./ekofin.al

Më të lexuarat