Banka Botërore: Turizmi mbi trashëgiminë kulturore në Shqipëri po nxit investime

Jugu i Shqipërisë po gjallërohet permes investimeve në restaurimin e trashëgimisë kulturore dhe përmirësimin e infrastrukturës në qytete si Berati, Gjirokastra, Përmeti dhe Saranda.

Restaurimi i trashëgimisë kulturore dhe infrastruktura moderne

Jugu i Shqipërisë po përjeton një transformim të dukshëm falë investimeve në restaurimin e trashëgimisë kulturore dhe përmirësimin e infrastrukturës. Qytete si Berati, Gjirokastra, Përmeti dhe Saranda po kthehen në destinacione tërheqëse turistike, duke kombinuar historinë dhe bukuritë natyrore me shërbime moderne.

Projekti për Zhvillimin e Integruar Urban dhe të Turizmit (PIUTD), i zbatuar nga Qeveria Shqiptare në bashkëpunim me Bankën Botërore, ka mundësuar restaurimin e zonave historike, përmirësimin e infrastrukturës publike dhe zgjerimin e shërbimeve turistike, duke krijuar mundësi të reja ekonomike dhe vende pune.

Restaurime dhe përmirësime të dukshme

PIUTD është përqendruar në restaurimin e 12 zonave kryesore turistike, si Qafa e Pazarit, shëtitorja e Sarandës dhe kalatë e Beratit, Gjirokastrës, Borshit dhe Kaninës. Deri më tani janë përmirësuar gati 200,000 m² hapësira publike përmes rikonstruksionit të rrugëve me kalldrëm, asfaltimit, rehabilitimit të shesheve dhe instalimit të ndriçimit, tabelave orientuese, shtigjeve dhe pikave të informacionit për vizitorët.

Rritje e ndjeshme e numrit të turistëve

Referuar të dhënave të INSTAT, Shqipëria regjistroi një rritje prej 82% të numrit të vizitorëve në vitin 2024 krahasuar me 2019. Në Jug, rritja është edhe më e lartë: Berati ka pritur katërfishin e turistëve, ndërsa Gjirokastra gjashtëfishin. Ky fluks po nxit investime private dhe zhvillim të bizneseve vendase.

Investime private dhe zhvillim ekonomik

Rritja e turizmit po përkthehet në investime të reja nga sektori privat. Familjet po shndërrojnë shtëpitë karakteristike në bujtina dhe po ofrojnë eksperienca kulinarie dhe kulturore. Gjithashtu, po zhvillohen projekte inovative si shtigje për ecje dhe biçikleta, autobusë elektrikë, varka turistike dhe instalime zip-line.

Sipas Bankës Botërore, numri i bizneseve të lidhura me turizmin në zonat e mbështetura nga projekti është më shumë se dyfishuar që nga viti 2019, duke gjallëruar turizmin e aventurës dhe aktivitetet rekreative në natyrë.

Përfitime sociale dhe rikthim i ish-banorëve

Ky zhvillim po kthen ish-banorët në vendlindjet e tyre për të investuar dhe për të sjellë ide të reja. Rritja e mundësive të punësimit, veçanërisht për gratë, të rinjtë dhe personat me aftësi të kufizuara, po ndihmon në rigjallërimin e komuniteteve.

Kristi Magllara, e kthyer në Sarandë pas 15 vitesh jashtë vendit, deklaron: “Kur pashë zhvillimin e turizmit në Shqipëri, mendova se kishte ardhur momenti i duhur për t’u rikthyer në shtëpi, për të zhvilluar biznesin familjar dhe për të sjellë ide të reja”.

Model i qëndrueshëm zhvillimi

Banka Botërore vlerëson se ky është një model i zhvillimit të qëndrueshëm. Projekti ruan asetet natyrore dhe kulturore, duke kombinuar zhvillimin ekonomik me mbrojtjen e mjedisit. Bizneset vendase po fitojnë aftësi dhe përvojë për të mbështetur një turizëm të qëndrueshëm dhe afatgjatë.

Ky model tregon se si ruajtja e trashëgimisë dhe zhvillimi i turizmit kulturor, të mbështetur nga komunitetet dhe partnerët ndërkombëtarë, mund të gjenerojnë vende pune, të nxisin investime dhe të krijojnë një ekonomi më të fortë dhe të diversifikuar. /ekofin.al

Më të lexuarat