Bien me 67 për qind sipërfaqet për leje ndërtimi në 3-mujorin e dytë
Gjatë tremujorit të dytë të vitit 2025, sektori i ndërtimit në Shqipëri ka shënuar një rënie të dukshme në disa prej treguesve kryesorë, sipas të dhënave të publikuara nga INSTAT.
Pavarësisht një aktiviteti të lartë në disa qarqe, numri total i lejeve të ndërtimit dhe vlera e projekteve të miratuara kanë ardhur në ulje krahasuar me të njëjtën periudhë të vitit të kaluar.
Në total, janë miratuar 352 leje ndërtimi për ndërtesa të reja, një shifër që përfaqëson një rënie të lehtë prej 0,6% në krahasim me tremujorin e dytë të vitit 2024, kur ishin dhënë 354 leje.
Më e theksuar është rënia në sipërfaqen e planifikuar për ndërtim, e cila ka zbritur në 278.389 metra katrorë, duke shënuar një ulje të ndjeshme prej 67,0% nga 844.137 metra katrorë që ishin planifikuar në të njëjtën periudhë të një viti më parë.
Ndryshime të mëdha janë shënuar edhe në aspektin ekonomik të projekteve ndërtimore. Vlera e përgjithshme e miratuar e projekteve ndërtimore, që përfshin si ndërtesat, ashtu edhe punimet inxhinierike, ka rënë në 18,4 miliardë lekë, një ulje prej 45,5% krahasuar me 33,7 miliardë lekë të tremujorit të dytë 2024.
Sa i përket strukturës së lejeve, ndërtimet për banim zënë pjesën më të madhe, me 271 leje ndërtimi dhe një sipërfaqe prej 119.051 metra katrorë. Ndërtesat jo-rezidenciale, përfshirë hotele, struktura tregtare dhe industriale, përbëjnë 81 leje, me një sipërfaqe totale prej 159.338 metra katrorë.
Në nivel rajonal, qarku i Durrësit ka dalë në krye për nga aktiviteti ndërtimor, me 156 leje ndërtimi të reja dhe një sipërfaqe ndërtimi prej 129.617 metra katrorë, duke reflektuar një përqendrim të konsiderueshëm të zhvillimeve urbane në këtë zonë.
Ndërkohë, qarqet Durrës, Korçë dhe Shkodër kanë shënuar një rritje të ndjeshme të vlerës së projekteve ndërtimore, një sinjal i mundshëm për investime të reja në infrastrukturë dhe zhvillim ekonomik rajonal.
Megjithatë, vlen të theksohet se këto statistika mbështeten ekskluzivisht në të dhëna të siguruara nga bashkitë, të cilat janë autoritetet kryesore për dhënien dhe raportimin e lejeve të ndërtimit. Edhe pse ligji parashikon përfshirjen e institucioneve të tjera përmes VKM nr. 408, datë 13.5.2015, aktualisht mungon një sistem i unifikuar dhe standard i raportimit nga të gjitha entet përkatëse pranë INSTAT./ekofin.al
