Regjistrimet për klasat e para dhe të dhjeta, mundësia e fundit në 5 shtator
Ministrja Ogerta Manastirliu njoftoi se më 5 shtator do të rihapen regjistrimet për klasat e para dhe të dhjeta.
Ministrja e Arsimit dhe Sportit, Ogerta Manastirliu, përmes një njoftimi në rrjetet sociale njofton rihapjen e regjistrimeve për nxënësit e klasave të para dhe të dhjeta të arsimit parauniversitar në datën 5 shtator.
Aplikimi kryhet online, duke ndjekur hapat e udhëzuar në shërbimin përkatës për regjistrim në platformën zyrtare e-Albania. Gjithashtu, procesi merr vetëm pak minuta kohë.
Nga ana tjetër, prindërit nuk mund të zgjedhin shkollën. Ata janë të detyruar ta regjistrojnë fëmijën në institucionin edukues që i përcakton sistemi. Nxënësve të klasave të para i lejohet të regjistrohet në institucionin arsimor publik, që mbulon vendbanimin e personit që ushtron përgjegjësinë prindërore të nxënësit. Harta e mbulimit të territorit, e miratuar nga njësia vendore, respektohet gjatë regjistrimit të nxënësve në klasën e parë.
Po kështu nxënësit regjistrohen në gjimnaz publik sipas zonës së gjimnazit, pra sipas planifikimit paraprak të Zyrave Vendore të Arsimit Parauniversitar. Zona e gjimnazit dhe planifikimi paraprak respektohen me përpikmëri nga drejtori i IA-së.
Personi që ushtron përgjegjësinë prindërore, bën aplikimin online duke plotësuar të dhënat e nevojshme të formularit dhe pret përgjigjen e miratimit ose refuzimit të aplikimit.
Ndërkohë, pranimet në shkollat e arsimit të mesëm të orientuar (artistike, sportive, për gjuhët e huaja dhe shkolla për fusha të tjera) bëhen sipas përcaktimeve të udhëzimit përkatës të ministrit. /Scantv
