Rritja ekonomike në Eurozonë mbeti e ngadaltë në gusht

Ekonomia e Eurozonës u rrit me ritme të ngadalta në gusht, ndërsa dobësia në sektorin e shërbimeve zbehu përfitimet nga industria.

Ekonomia e Eurozonës vijoi të zgjerohej me ritme shumë të ngadalta në gusht, pasi rritja e dobët e sektorit të shërbimeve zbehu përmirësimin e prodhimit në industri, megjithëse u shënua rritja e parë e përgjithshme e porosive të reja që prej majit të vitit të kaluar, tregoi të mërkurën një anketë.

Indeksi i Përbashkët i Blerësve të HCOB për Eurozonën (PMI), i përpiluar nga S&P Global, u rrit lehtë në 51.0 në gusht nga 50.9 në korrik, duke arritur nivelin më të lartë 12-mujor, por gjithsesi duke treguar rritje vetëm modeste. Kufiri 50.0 ndan zgjerimin nga tkurrja.

Porositë e reja në të gjithë ekonominë u rritën për herë të parë që nga maji i vitit të kaluar, edhe pse në mënyrë të lehtë, teksa kërkesa e brendshme kompensoi rënien e porosive të eksportit, të cilat ranë me ritmin më të shpejtë që nga marsi. Ndër ekonomitë më të mëdha të Eurozonës, Spanja mbeti performuesja më e mirë, pavarësisht ngadalësimit të rritjes, e ndjekur nga Italia, e cila shënoi një përshpejtim të lehtë. Zgjerimi i Gjermanisë u ngadalësua, ndërsa Franca mbeti në territor negativ, edhe pse PMI i saj u rrit në nivelin më të lartë 12-mujor, në 49.8.

“Ngasja e një biçiklete shumë ngadalë mund të të rrëzojë. Ky është rreziku me të cilin po përballet Eurozona. Po, ekonomia është duke u rritur që nga fillimi i vitit, por ritmi është tepër i ngadaltë”, tha Cyrus de la Rubia, kryeekonomist në Hamburg Commercial Bank. “Tensionet politike në Francë dhe Spanjë, pasiguria rreth marrëveshjes tregtare BE-SHBA dhe problemet e vazhdueshme në sektorin kyç të automobilave nuk po ndihmojnë”, shtoi ai. BE dhe SHBA arritën një marrëveshje kuadër tregtare në fund të korrikut, por deri më tani është zbatuar vetëm tarifa bazë prej 15%.

Sektori i shërbimeve, që përbën pjesën më të madhe të ekonomisë së bllokut, pa ngadalësim të rritjes në një ritëm minimal, me PMI-në që ra në 50.5 në gusht nga niveli katërmujor më i lartë 51.0 në korrik. Ndërkohë, prodhimi në industri shënoi rritjen më të fortë në gati tre vjet e gjysmë, duke ofruar një pikë të ndritshme në një panoramë të zymtë ekonomike.

Në përgjithësi, rritja e punësimit u përshpejtua në nivelin më të lartë 14-mujor, me kompanitë e shërbimeve që rritën numrin e të punësuarve, ndërsa fabrikat vijuan të shkurtonin stafin. Megjithatë, presionet mbi çmimet u intensifikuan në gusht, me kostot e inputeve që u rritën me ritmin më të shpejtë që nga marsi dhe kompanitë që rritën çmimet në nivelin më të lartë të katër muajve, duke ndërlikuar potencialisht pritshmëritë e Bankës Qendrore Europiane për inflacionin.

Inflacioni i përgjithshëm në bllok u rrit pak në gusht në 2.1%, duke qëndruar pranë objektivit prej 2% të BQE-së dhe gjasat janë që të forcojë pritshmëritë për mbajtjen e pandryshuar të normave të interesit në afatin e afërt.

Besimi i bizneseve ndryshoi shumë pak nga korriku dhe mbeti nën mesataren afatgjatë, duke sugjeruar se kompanitë mbeten të kujdesshme për perspektivat e ardhshme të rritjes. /Monitor(https://monitor.al/rritja-ekonomike-ne-eurozone-mbeti-e-ngadalte-ne-gusht/)

Më të lexuarat