Qeveria nis zyrtarisht detyrën, Kryeministri dhe anëtarët e kabinetit betohen në Presidencë
Qeveria ‘Rama 4’ ka nisur zyrtarisht detyrën.
Kryeministri Edi Rama, së bashku me 16 anëtarët e kabinetit të tij, u betuan para Presidentit të Republikës, Bajram Begaj, duke shënuar nisjen e mandatit të katërt të socialistëve.
“Betohem në nderin tim, se do të zbatoj me përpikëri Kushtetutën dhe ligjet, si dhe do të kryej me përgjegjësi detyrën shumë të rëndësishme që më është besuar, të anëtarit të Këshillit të Ministrave". Duke shqiptuar këtë fjali dhe me dorën në Kushtetutë, kryeministri Edi Rama e me radhë pas tij, të 16 ministrat, u betuan sot para Presidentit të Republikës, Bajram Begaj, duke shënuar kështu nisjen e mandatit të katërt për socialistët.
Ashtu siç pritej, për ministren e parë virtuale në botë, Diella, nuk ka një dekret nga Presidenti Begaj. Emri i saj vetëm është në nenin 2 të dekretit të parë të Presidentit, ku përveçse emëroi Edi Ramën, kryeministër, specifikoi se ushtron edhe përgjegjësinë "për ngritjen dhe funksionimin e ministrit virtual të Inteligjencës Artificiale “Diella”.
Betimi i kabinetit qeveritar vjen pas kaosit një ditë më parë në Kuvend, ku ministrat u votëbesuan në seancën që zgjati vetëm 25 minuta. Pas betimit, siç tashmë kryeministri Edi Rama e ka bërë traditë, do të mbajë edhe mbledhjen e parë në Kryeministri.
QEVERIA
Belinda Balluku - Zv/Kryeministre dhe ministre e Energjisë e Infrastrukturës
Albana Koçiu - Ministria e Punëve të Brendshme
Elisa Spiropali -Ministria për Evropën dhe Punët e Jashtme
Petrit Malaj - Ministria e Financave
Blendi Gonxhja - Ministria e Kulturës, Turizmit dhe Sportit
Sofjan Jaupaj - Ministria e Mjedisit
Mirela Kumbaro - Ministria e Arsimit
Evis Sala - Ministria e Shëndetësisë dhe Mirëqenies Sociale
Delina Ibrahimaj - Ministria e Ekonomisë dhe Inovacionit
Besfort Lamallari - Ministria e Drejtësisë
Pirro Vengu - Ministria e Mbrojtjes
Andis Salla – Ministria e Bujqësisë dhe Zhvillimit Rural
Ervin Demo – Ministri i Shtetit për Pushtetin Vendor
Majlinda Dhuka – Ministre e Shtetit dhe Kryenegociatorja e Shqipërisë
Adea Pirdeni - Ministre e Shtetit për antikorrupsionin
Toni Gogu - Ministria për Marrëdhëniet me Parlamentin
