NATO mbledhje urgjente, kërcënon Rusinë: Do mbani përgjegjësi, do të aktivizojmë Nenin 5
NATO ka reaguar ashpër ndaj shkeljes së hapësirës ajrore të Estonisë nga avionët rusë, duke e cilësuar veprimin e Moskës si provokues dhe të papranueshëm.
NATO i ka dërguar një mesazh Rusisë që të ndalojë sjelljen e saj “të papërgjegjshme” dhe “të pamatur” kundër shteteve anëtare, duke dënuar shkeljet e Moskës më 19 shtator, kur tre MiG-31 të armatosur rusë shkelën hapësirën ajrore estoneze për më shumë se dhjetë minuta.
Duke paralajmëruar për aktivizimin e Nenit 5, klauzolës së mbrojtjes kolektive që thotë se një sulm ndaj një shteti anëtar të NATO-s konsiderohet sulm ndaj të gjithëve, Këshilli i Atlantikut të Veriut, i cili u mblodh me kërkesë të Estonisë, shprehu “solidaritetin e plotë” me aleatët, hapësira ajrore e të cilëve është shkelur.
“Rusia mban përgjegjësi të plotë për këto veprime, të cilat po përshkallëzohen, mbartin rrezikun e llogaritjes së gabuar dhe vënë në rrezik jetët. Këto veprime duhet të ndalen”, thekson Këshilli i Atlantikut të Veriut.
“Përgjigja e NATO-s do të mbetet e fortë”
NATO thotë se përgjigjja e saj “ndaj veprimeve të pamatura të Rusisë do të mbetet e fortë”. Në këtë kontekst, Operacioni Eastern Sentry u nis më 12 shtator për të forcuar pozicionin e NATO-s në të gjithë krahun lindor, informon media ndërkombëtare.
“Ne do të rrisim më tej aftësitë tona dhe do të forcojmë qëndrimin tonë parandalues dhe mbrojtës, duke përfshirë mbrojtjen efektive ajrore.”
Me një ton të ashpër, Këshilli i Atlantikut të Veriut thekson se Rusia “nuk duhet të ketë asnjë dyshim: NATO dhe Aleatët do të përdorin, në përputhje me të drejtën ndërkombëtare, të gjitha mjetet e nevojshme ushtarake dhe jo-ushtarake për të mbrojtur veten dhe për të penguar çdo kërcënim nga çdo drejtim. Ne do të vazhdojmë të përgjigjemi në mënyrën, në kohën dhe në arenën që zgjedhim ne. Angazhimi ynë ndaj Nenit 5 mbetet i palëkundur.”
Në të njëjtën kohë, NATO po përcjell se anëtarët e Aleancës nuk do të ndikohen nga veprimet e papërgjegjshme të Rusisë dhe do të vazhdojnë të mbështesin Ukrainën. /Panorama
